भूकम्प सुरक्षा दिवसय् विपद सुरक्षा व व्यवस्थापन सम्बन्धी प्रदर्शन
येँ(नेपालभाषा टाइम्स)- २५ क्वःगु राष्ट्रिय भूकम्प सुरक्षा दिवस हंगु दु । दिवसया झ्वलय् थनया कमलपुखुलिइ विपद सुरक्षा व व्यवस्थापन सम्बन्धी प्रदर्शन याःगु खः ।
उगु इलय् येँ महानगरपालिकापाखें मि नियन्त्रण, सतक दुर्घटना व्यवस्थापन, विपद् व्यवस्थापनय् प्रयोग जुइगु साधन व उपकरणलिसें प्रविधिया ब्वज्या याःगु खः । ब्वज्याय् नेपाली सेना, नेपाल प्रहरी, सशस्त्र प्रहरी बलपाखें दुना वःगु संरचना दुने ल्हानाच्वंपिं मनूत मालेगु, खोजी, उद्धारय् प्रयोग जुइगु हलंज्वलंया नं ब्वज्या याःगु खः ।
वंगु माघ २ व ३ गते निन्हुयंकं ब्वज्या यायेगु तयारी याःगु खःसां माघ १ गते पोखराय् जूगु विमान दुर्घटनाय् सकलें यात्रु सीवं सरकारं २ गते शोक विदा बीगु निर्णय याःगुलिं उकुन्ह गुगुं नं औपचारिक ज्याझ्वः मयाःगु खःसा वंगु मंगलवाः पूर्व निर्धारित ज्याझ्वः कथं उगु ब्वज्या याःगु खः । ब्वज्याय् येँ बारुण यन्त्र ज्याकुथिं ततःजाःगु भवनय् मि नियन्त्रण यायेगु विधिया नं प्रदर्शन याःगु खः ।
महानगरया उपप्रमुख सुनिता डंगोल, राष्ट्रिय विपद जोखिम न्यूनीकरण तथा व्यवस्थापन प्राधिकरणया कार्यकारी प्रमुख अनिल पोखरेल, येँ महानगरया प्रमुख प्रशासकीय अधिकृत बसन्त अधिकारी लगायतं ब्वज्याया अवलोकन यासें जानकारी कयादीगु खः ।
ज्याझ्वलय् नवासें महानगर उपप्रमुख डंगोलं समुदाय व ब्वनेकुथिइ जोखिम पूर्व तयारीया निंतिं सुचं यंकेमाःगु खँय् बः बियादिसें ब्वनेकुथिया विद्यार्थी व समुदाय लक्षित वर्ग जुइमाः धयादिल । लिसें वय्कलं विपद क्षति व्यवस्थापन पूर्व तयारीया बारे नं जानकारी बीमाः धासें उत्थानशील सहर निर्माणया निंतिं प्राविधिक ख्यःलिसे मिले जुयाः ज्या यायेत तयार दु धयादिल ।
ज्याझ्वलय् प्राधिकरणया कार्यकारी अधिकृत पोखरल, महानगरया प्रमुख प्रशासकीय अधिकृत अधिकारी, ३ वडाअध्यक्ष पे्रम थापा, भूकम्प प्रविधि राष्ट्रिय समाज, नेपाल (एनसेट)या कार्यकारी निर्देशक सूर्यनारायण श्रेष्ठं नं भूकम्पीय क्षति व्यवस्थापन, विपद् व्यवस्थापन, न्यूनीकरणलिसें सचेतनात्मक ज्याझ्वः संचालन यायेमाःगु खँय् बः बियादीगु खः ।
वि.सं. १९९० माघ २ गतेया विनाशकारी भुखाचं लाकूगु क्षतिया लुमन्तिइ २०५५ सालनिसें दँय्दसं राष्ट्रिय भूकम्प सुरक्षा दिवस हनावयाच्वंगु दु ।
LEAVE YOUR COMMENTS