कवयित्री रजनी मिलाया चिनाखँ मुना विमोचित

किपू (नेपालभाषा टाइम्स)÷ कवयित्री रजनी मिलाया चिनाखँ मुना ‘स्वस्वं तनावंगु सर्गः’या विमोचन जूगु दु । नेपालभाषा एकेदेमिं पिथंगु सफू शनिवाः छगू ज्याझ्वःया दथुइ एकेदेमिया हलय् समालोचक, भाषाविद् ज्योतिप्रभा तुलाधरं विमोचन यानादीगु खः ।

एकेदेमिया भाइस चान्सलर मल्ल के सुन्दरया सभापतित्वय् जूगु ज्याझ्वलय् मू पाहाँ तुलाधर लिसें पाहाँपिं वरिष्ठ समालोचक व भाषाविद् डा. सुन्दरकृष्ण जोशी, लुम्बिनी बौद्ध विश्वविद्यालयया डिन माणिकरत्न शाक्य, नेपाल प्रज्ञा प्रतिष्ठानया पुलांम्ह प्राज्ञ लक्ष्मी माली, कवयित्री प्रतिसरा साय्मिपिंसं विमोचित चिनाखँ मुनायात कयाः न्ववानादीगु खः ।

एकेदेमिया सदस्य सचिव डा. पुष्पराज राजकर्णिकारं लसकुस यानादीगु ज्याझ्वलय् प्रतिसरा साय्मि, विनिता वज्राचार्य, विना नेम्कुलपिंसं सफुलिइ दुथ्याःगु चिनाखँ नं ब्वनाः न्यंकूगु खः ।