नेवाः जातियात म्वाकेगु खःसा इमिगु मू पहिचान भाय् म्वाकेमाः
येँ – नेवाःतय्गु राष्ट्रिय संगठन नेवाः देय् दबूलिं नीप्यक्वःगु बुन्हि हन । थनया नेपाः ब्यांक्वेटय् वंगु यंलाथ्व सप्तमि, आइतवाः कुन्हु छगू विशेष ज्याझ्वः यासें देय् दबुलिं बुन्हि हंगु खः । देय् दबूया नायः नरेश ताम्राकारया सभापतित्वय् जूगु ज्याझ्वलय् मूपाहांकथं आदिवासी जनजाति आन्दोलनलिसें नेवाः आन्दोलन, मानव अधिकारवादी आन्दोलनया न्ह्यलुवा पद्मरत्न तुलाधर झायादीगु खः ।
ज्याझ्वलय् नकतिनि जक ज्याःजंक्व यानादीम्ह नापं तःजिनक नागरिक अभिनन्दनपाखें सम्मानित जुयादीम्ह बहुआयामिक व्यक्तितव तुलाधरयात देय् दबूया नायः ताम्राकारं बेतालिं चिकाः हनादीगु खः । ज्याझ्वलय् नवासें मूपाहां तुलाधरं महाकवि सिद्धिदास महाजुया ‘भाषा म्वाःसा जाति म्वाइ’ धइगु धापूयात लुमंकादिसें नेवाःतय्त म्वाकातय्गु खः धइगु जूसा नेवाःतय्गु मू पहिचानया रुपय् दयाच्वंगु भाय् म्वाकेमाः धयादिल ।
लिसें वय्कलं नेवाःतय् न्ह्यागु संस्थां नं माइन्यूट च्वयेबलय् नेवाः भासं हे च्वयेत नं इनाप यानादिल ।थुकथं हे ज्याझ्वलय् विश्वया दकलय् तजाःगु च्वापुगुँ सगरमाथा आरोहण यानादीपिं नेवाः म्ह्याय्मचा कल्पना महर्जन, रोजिता बुद्धाचार्य, पूर्णिमा श्रेष्ठलिसें क्रिस महर्जन, धनकृष्ण साजवाः व सजेन महर्जनपिंत नं हनेज्या ज्या याःगु खः ।
उगु हे ज्याझ्वलय् शेषनारायण महर्जनं च्वयादीगु बासुरिया स्वर लिपि व पछिमाःया बोलया सपूm नं पितब्वज्या याःगु खःसा थिमिया नांजाःम्ह संस्कृतिविद् श्रीगोपाल प्रजापतियात नं बेतालिं चिकाः हनापौ देछाःगु खः । ज्याझ्वलय् कल्पना महर्जन व शेषनारायण महर्जनं नं नुगःखँ तयादीगु खः ।
LEAVE YOUR COMMENTS