वर्ल्ड वज्राचार्य अवार्ड ज्याझ्वः जुइगु

येँ – वज्राचार्य क्लबया ग्वसालय् वज्राचार्य समुदायपाखें शिक्षाया ख्यलय् उत्कृष्ट जुयादीपिंत ‘वर्ल्ड वज्राचार्य अवार्ड–२०१९’ पाखें सम्मान याइगु जूगु दु । थ्व हे वइगु पुस १२ गते थनया प्रज्ञा भवन कमलादिइ छगू तःजिगु ज्याझ्वःया दथुइ उगु सम्मान लःल्हायेगु क्लबं पत्रकार सम्मेलन यासें जानकारी बिउगु दु ।

पत्रकार सम्मेलनय् ज्याझ्वःया कजि शैलेन्द्रमान वज्राचार्यं बियादीगु जानकारीकथं उगु अवार्ड ज्याझ्वलय् विद्यालय तहनिसें विश्वविद्यालयपाखें उच्च शिक्षा हासिल यानादीपिं करिब सछिम्ह वज्राचार्य कुलपुत्र, कुलपुत्री व कुलबधूपिंत ‘वल्र्ड वज्राचार्य अवार्ड’ लःल्हायेगु जानकारी बियादिल ।

पत्रकार सम्मेलनय् बिउगु जानकारीकथं नेपाल संवत् ११३८ व ११३९ दँ तकया दुने विश्वन्यंकंया गुगुं नं विद्यालय, विश्वविद्यालयं एसइइ परीक्षानिसें पिएचडी (विद्यावारिधि) वा व सरह उत्तीर्ण यानाः उच्च शिक्षा हासिल यानादीपिं वज्राचार्य समुदाययात सम्मान याइगु जूगु दु । सम्मानया निंतिं वज्राचार्य समुदायया कुलपुत्र, कुलपुत्री व कुलबधुपिंसं क्लबया आधिकारिक वेबसाइट www.bajracharyaclub.org.np लय् वनाः फाराम जायेके माःगु व्यवस्था यानागु नं पत्रकार सम्मेलनय् जारी याःगु विज्ञप्तीइ न्ह्यथनातःगु दु ।

समाजया थीथी ख्यलय् प्रतिष्ठित व्यक्तित्वपिनिगु उपस्थितिइ सांगीतिक व सांस्कृतिक ज्याझ्वःया प्रस्तुतिलिसें समाजया थीथी क्षेत्रय् ज्वःमदुगु योगदान बियादीपिंत वल्र्ड वज्राचार्य अवार्डपाखें सम्मान यायेगु व छम्हेसित ‘लाइफ टाइम एचिभमेन्ट अवार्ड’ नं लःल्हायेगु पत्रकार सम्मेलनय् जानकारी बिउगु दु ।

क्लबं बिउगु जानकारीकथं एसइइनिसें स्नातकोत्तर तगिमय् दक्वं तहय् सर्वोत्कृष्ट ल्याः हयाः उत्तीर्ण जूपिं छम्ह छम्हेसित सम्मान यायेगु व विद्यावारिधि यानादीपिं सकसितं सम्मान याइगु ग्वसाः दु । वेबसाइटय् वनाः आवेदन फाराम जायेकाः ज्याझ्वलय् ब्वति कायेत क्लबं सकसितं इनाप यासें ब्वति काःपिं सकसितं दसिपौ लःल्हाइगु ज्याझ्वः दु ।

क्लबं बिउगु मेगु छगू जानकारीकथं प्रत्येक निदँय् छक्वः थुकथंया ज्याझ्वः याना वनेगु व दक्वं निर्णयया अधिकार क्लबय् निहित जुइगु नं क्लबं पत्रकार सम्मेलनय् जानकारी बिउगु दु ।

सम्बन्धित बुखँ

LEAVE YOUR COMMENTS