ज्ञानमाला भजन प्रशिक्षण क्वचाल

थिमि(नेपालभाषा टाइम्स)- थनया लोकेश्वर ज्ञानमाला भजन खलःया ग्वसालय् न्ह्यानाच्वंगु ज्ञानमाला भजन प्रशिक्षण क्वचाःगु दु । वंगु भदौ १ निसें शुरु जूगु भजन प्रशिक्षण नासः द्यः पुजा यानाः क्वचायेकूगु खः ।

मुख्य गुरु देवबहादुर वज्राचार्य व सहायक गुरुपिं अष्टचन्द्र वज्राचार्य व राकेश वज्राचार्यं बियादीगु प्रशिक्षणय् निम्ह मिजंलिसें नीनिम्हेसिनं प्रशिक्षण कयादीगु खः । मध्यपुर थिमि नगरपालिकाया समन्वयय् उगु प्रशिक्षण जूगु खः ।

समापन ज्याझ्वलय् नवासें उपप्रमुख विजयकृष्ण श्रेष्ठं कला संस्कृतियात अर्थ व्यवस्थालिसे स्वाना यंकेमाःगु खँय् बः बियादिल । लिसें वय्कलं भावनाया लिधंसाय् कला संस्कृतिया संरक्षण व प्रवद्र्धन यायेमाःगु खःसां ध्यबा मदयेकं छुं जुइमखु धयादिल ।

समाजसेवी श्याम श्रेष्ठया संयोजकत्वय् रविन वज्राचार्य व राकेश वज्राचार्य दुजः जुयादीगु भजन खलःया उपसमितिया व्यवस्थापनय् उगु प्रशिक्षण जूगु खः ।

तालिम समापन ज्याझ्वलय् नगर प्रमुख सुरेन्द्र श्रेष्ठ ४ वडाअध्यक्ष बालकृष्ण पात्या श्रेष्ठलिसें वडा सदस्यपिं मदन ख्याः श्रेष्ठ, रामकेशरी श्रेष्ठया नं उपस्थिति दुगु खः ।