पत्रकार दबूया विचाः मुँज्या

येँ- नेवाः पत्रकार राष्ट्रिय दबूया ग्वसालय् वंगु शनिवाः छगू विचाः मुँज्या जुल । दबूया थीथी कचाया पदाधिकारी दुजःपिनि मदुपिं छेँजःया लुमन्तिइ उगु विचाः मुँज्या जूगु खः ।

भर्चुअल माध्यमं जूगु विचाः मुँज्याय् पुलांम्ह पत्रकारनापं वाम बुद्धिजीवि व वरिष्ठ समालोचक माणिकलाल श्रेष्ठ, नेपाःया न्हापांगु सन्ध्याकालीन न्हिपौ ‘विश्वभूमि’या सम्पादकनापं प्रकाशक सुशीलवीर सिंह कसाः, दबूया पुलांम्ह केन्द्रीय दुजः राजेन्द्र शाक्यया मां व अबु, येँ जिल्ला कचाया नायः अर्विन्द्रमान सिंहया मां इन्द्रमाया सिं, दुजः शरणहरि डंगोलया मां श्रीमाया डंगोल, यल कचाया दुजः गुणराज शाक्यया मां बेखामाया शाक्य मदुगु दुःखय् पत्रकार दबुलिं विचाः मुँज्या याःगु खः ।

ज्याझ्वलय् दबूया केन्द्रीय नायः सुरजवीर वज्राचार्यं दिवंगत जुयादीपि निर्वाण कामना यासे दुःखंकःपिं छेँजःपिं सकसितं दबूयापाखें विचाः हायेकादीगु खः । दुःखंकःपिं पत्रकारतय्पाखें गुणराज शाक्यं थः व छेँजःयात कोरोना संक्रमण व मां मदुगु दुःखय् भाव विभोर जुयाः नुगःखँ तयादीगु खः ।

दबूया पुलांम्ह केन्द्रीय मूछ्याञ्जे उदेन न्हूसाय्मिं थौंया विषम परिस्थितिइ नेवाः पत्रकारतय्त गुकथं तिबः बी फइ धइगु खँय् ध्यान बियाः पत्रकार दबूलिं थ्व इलय् थःगु उपस्थिति क्यनेगु स्वयेमाः धयादिल ।

ज्याझ्वलय् दबूया न्वकु रचना श्रेष्ठ, येँ जिल्लाया दीलिप शाहीपिंसं नं नुगःखँ तयादीगु विचाः मुँज्याय् नेवाः ख्यलय् थीथीकथं योगदान बियादीपिं समालोचक इन्द्र माली, वरिष्ठ म्येँ हालामि प्रेमध्वज प्रधान, शिक्षाविद्, बाखं च्वमि लक्ष्मण राजवंशी, ब्याकरणविद् रमापतिराज शर्मा, वरिष्ठ सरोदवादक मोहनसुन्दर श्रेष्ठयात नं पत्रकार दबुलिं लुमंकूगु खः ।

थ्व हे झ्वलय् पत्रकार दबूपाखें नेवाः पत्रकारतय्त ग्वाहालि यायेगु ल्याखं कोविड विरुद्र द्रुत प्रतिकार्य समूह गठन यानागु जानकारी नं बिउगु खः । दबूया केन्द्र्रीय दांभरिं सुरेन्द्रभक्त श्रेष्ठया संयोजकत्वय् सहकोषाध्यक्ष बाबुकाजी साःछेँ श्रेष्ठ, दुजःपिं विगेन तुलाधर, विराजकाजी राजोपाध्याय, अनुप प्रधान, पूर्णभक्त दुवाल, सुनिता डंगोल दुजः दुगु प्रतिकार्य समूह गठन याःगु खः ।

उगु समूहं कोरोना संक्रमित नेवाः पत्रकारतय्त राहत, पौष्टिक नसाज्वलंलिसें आर्थिक रुपं नं ग्वाहालि यायेगु योजना दुगु संयोजक श्रेष्ठं कनादिल ।

सम्बन्धित बुखँ

LEAVE YOUR COMMENTS