येँ मनपाया गतिविधिइ राजनीतिक दलतय् चिउताः
येँ – देय्या हे दकलय् न्हापांगु महानगरपालिका येँ महानगरपालिकां यानाच्वंगु भौतिक पूर्वाधार, विकास निर्माणलिसें भुखाय् लिपाया पुनःनिर्माण व आर्थिक गतिविधियात कयाः राजनीतिक दलतय्सं चिउताः क्यनेगु शुरु यानाहःगु दु । स्थानीय तहया निर्वाचन जूगु दछिलिपा जनप्रतिनिधितय्सं यानाच्वंगु थीथी गतिविधि नापं आर्थिक क्रियाकलापयात कयाः दलतय्सं उकथं चिउताः क्यनेगु शुरु यानाहःगु खः ।
थ्व झ्वलय् वंगु छुं ई न्ह्यः जक साझा पार्टीया रञ्जु दर्शनां येँ मनपा प्रमुख विद्यासुन्दर शाकययात नाप लानाः रानीपुखू पुनःनिर्माणया सम्बन्धय् जुयाच्वंगु गतिविधिया जानकारी कायेगु नापं उकिया विवरण माग यानादीगु खः ।
अथे हे वंगु शुक्रवाः डा. बाबुराम भट्टराईया नेतृत्वय् दुगु नयाँ शक्ति पार्टी नेपालं नं प्रमुख शाक्ययात नाप लानाः आर्थिक दँ २०७४÷७५ य् येँ महानगरपालिकां स्वीकृत याःगु नीति तथा कार्यक्रम व उगु दँय् थीथी शीर्षकय् जूगु खर्च पारदर्शी जुइमाःगु माग यासें विवरण सार्वजनिक यायेत माग याःगु खः ।
पार्टीया येँया संयोजक मानुषी यमिया नेतृत्वय् वंगु पुचलं येँ मनपाया सूचनाया हक, सुशासन व आर्थिक पारदर्शीताया थीथी विषयय् जानकारी बीत माग याःगु खः ।
LEAVE YOUR COMMENTS