ने. सं. ११४४ ञलाथ्व दशमी -

सांसद कोषया ध्यबा चरम दुरुपयोग

येँ – सांसद–तय्सं निर्वाचन क्षेत्र पूर्वाधार विशेष कार्यक्रमया बजेट अप्वयेके माल धकाः माग यानाच्वंगु हे इलय् न्हापा थ्व शीर्षकय् वनाच्वंगु बजेट चरम दुरुपयोग जुयाच्वंगु रिपोर्ट पिहांवःगु दु ।महालेखा परीक्षणया झ्वलय् सांसदतय्त निर्वाचन क्षेत्र पूर्वाधार विकासया निंतिं बिउगु ध्यबा तसकं दुरुपयोग जूगु खनेदुगु खः ।

प्रत्यक्षपाखें त्यानावःपिं सांसदतय्त स्वंगू करोड तका पूर्वाधार विकास बजेट शीर्षकय् बीगु यानाच्वंगु खः ।आः सांसदतय्सं थ्व ध्यबा झिगू करोड थ्यंकेमाःगु माग यानाच्वंगु दु ।महालेखा प्रतिवेदन कथं सांसदतय्सं थज्याःगु ध्यबा पूर्वाधार विकासय् खर्च मयासे थः आसेपासेतय्त इनेगु निसें चिचीधंगु कार्यक्रमय् खर्च यानाच्वंगु खनेदुगु खः ।

थुकिया छगू उदाहरण बिसें नायब महालेखापरीक्षक उद्धवचन्द्र श्रेष्ठं बीबीसीयात धयादीगु, ‘बारा व रौतहटय् सांसदतय्सं थ्व बजेटं ३४ लाख २८ हजार तका बराबरया साइकल इनेगु ज्या यात ।साइकल इनेगु धयागु ध्यबा इनेगु थें हे खः । सांसदतय्त थःगु निर्वाचन क्षेत्रया जनतायात ध्यबा इनेत धकाः ला सरकारं थ्व ध्यबा बिउगु मखुनि ।’वय्कःया कथं सांसदतय्सं योग शिविर चले यायेत तकं थ्वहे ध्यबाछ्यःगु लूगु दु ।

अथेहे मकवानपुरय् सांसदतय्सं थीथी झिगू उपभोक्ता समिति गठन यानाः छगू फर्मपाखें मतया लठ्ठा न्यानाः १ करोड ८ लाख २५ द्वः तका भुक्तानी याःगु दु । सार्वजनिक खरिद ऐन कथं झिगू लाख स्वयां अप्वः खर्च याये माल धाःसा प्रतिस्पर्धापाखें जक सामान न्यायेमाः । नायब महालेखापरीक्षक श्रेष्ठं धयादीगु दु, ‘सांसदतय्सं सार्वजनिक खरिद ऐन तकं पालना मयासे अनियमितता यानाच्वंगु दु ।’