ने. सं. ११४४ ञलाथ्व दशमी -

येँ मनपाया स्वाब संकलन भ्यान संचालनय्

येँ (नेपालभाषा टाइम्स) – येँ महानगर पालिकां कोरोना भाइरस परीक्षणया निंतिं स्वाब संकलन यायेगु ल्याखं मोबाइल भ्यान संचालनय् हःगु दु। मोबाइल भ्यान संचालनया निंतिं येँ महानगरपालिकां उपलब्ध याकूगु सवारी साधनय् नेपाल विज्ञान तथा प्रविधि प्रतिष्ठान (नास्टं) आवश्यक प्रविधि जडान याःगु खः ।

नास्टं पोजेटिभ एअर पे्रसर मेन्टेन्ड कक्ष जडान यानाः येँ मनपायात भ्यान लःल्हायेवं स्वाब संकलनया मोबाइल भ्यान संचालनय् हःगु खः । राष्ट्रिय सभागृहय् जूगु छगू ज्याझ्वःया दथुइ प्रविधि जडान जूगु भ्यान नास्टया सचिव डा. महेशकुमार अधिकारीं येँ मनपा प्रमुख विद्यासुन्दर शाक्ययात लःल्हानादीगु खः।

उगु इलय् येँ मनपा प्रमुख शाक्यं कोभिड-१९ महामारी राकेथाम, नियन्त्रण व उपचारया ज्यायात अझ प्रभावकारी यायेगु ल्याखं येँ मनपां मोबाइल भ्यानपाखें स्वाब संकलन शुरु यानागु जानकारी बियादिल । कोरोना भाइरसया संक्रमण, नियन्त्रण व उपचारयात प्रभावकारी यायेत थःपिं न्ह्याः वनाच्वनागु जानकारी बियादिसें वय्कलं नास्टया वैज्ञानिक व प्राविधिक अनुसन्धान केन्द्रपाखें डिजाइन व परीक्षण यानाः तयारी अवस्थाय् दुगु मोबाइल स्वाब संकलन भ्यान संचालनय् हयागु खः धयादिल ।

थुगु भ्यानपाखें अशक्त, अपांगता जूपिं, दीर्घ ल्वगि, ज्येष्ठ नागरिकया छेँय् छेँय् वनाः स्वाब संकलन यायेगु ल्याखं इमित हे लक्षित यानाः भ्यान संचालनय् हयागु नं वय्कलं जानकारी बियादिल । कन्ट्याक ट्रेसिबय् लाःपिनिगु निःशुल्क उपचार यायेगु जानकारी बियादिसें वय्कलं सरकारं या हे याइनि धकाः बेवास्ता यायेत स्वत धाःसा स्थिति नियन्त्रणं पिहां वनेफु धासें स्वास्थ्य मापदण्ड पालना यायेत नं वय्कलं इनाप यानादिल । उगु इलय् येँ मनपा उपप्रमुख हरिप्रभा खड्गी श्रेष्ठ, प्रमुख प्रशासकीय अधिकृत राजेश्वर ज्ञवाली, सहरी योजना आयोजया उपाध्यक्ष सरोज बस्नेत लगायतया उपस्थिति दुगु खः ।