यलया सांस्कृतिक सम्पदाय् मनपाया डोजर

यल (नेपालभाषा टाइम्स)- जावलाख्यःया तमकद्यः (उग्रचण्डी) नाप स्वाःगु सांस्कृतिक महत्वया थासय् यल महानगरपालिकां डोजर चले याःगु विरुद्ध म्हिगः स्थानीय सम्पदाह्यमिपिंसं प्रदर्शन यात । स्थानीय गुथियारतय्सं धार्मिक सांस्कृतिक ज्याखँ यानाच्वंगु यल मनपा वडा ४ (ङ) या कित्ता नं. १३५ दुने तयातःगु बार व पःखाः म्हीग नगर प्रहरीं डोजर चले यानाः थुना बिउगु खः।

महानगरपालिकां उगु थासय् पार्क दयेकेगु धासें अन दयेकातःगु सांस्कृतिक संरचनात थुनेगु कुतः याःगु खः । उगु थासय् यलया ताम्रकारतय् कुलद्यः कथं कयातःगु तमकःद्यः (उग्रचण्डीमाई) लिसे सम्बन्धित संरचनात लानाच्वंगु दु । अज्याःगु सांस्कृतिक लागा स्यंकेत स्वःगु धासें म्हिगः उकिया विरुद्ध प्रदर्शन याःगु खः ।

ताम्रकार समाजया नेतृत्वय् टंगलय् मुनाः वंगु स्थानीयतय् पुचलं पूच्वय् च्वंगु यल महानगरपालिका ज्याकू न्ह्यःने प्रदर्शन याःगु खः । उमिसं ‘खबरदार, ऐतिहासिक चौर व सम्पदा न्हंके दइ मखु’ धकाः च्वयातःगु प्लेकार्ड व ब्यानर नं ब्वया वःगु खः । ताम्रकार समाजं धाः कथं आः मनपां थुनेत्यंगु धार्मिक सांस्कृतिक थाय्या पुलांगु नां ‘मोसिख्यः’ खः । थ्व थासय् वंगु सछिदँ न्ह्यवंनिसें ताम्रकार समाजं थःगु धार्मिक पूजा, संस्कार व गुथि न्ह्याका वयाच्वंगु दु । तर आः वयाः ताम्रकार समाजयात छुं जानकारी तकं मबिसे छक्वलं डोजर याःगु खँय् नं समाजं विरोध याःगु दु ।
उगु थासय् तुं, जरुं नापं दुगु खः ।