मानन्धर युवा समूहया रजत जयन्ती

थिमि (नेपालभाषा टाइम्स)- थनया मानन्धर युवा समूहया रजत जयन्ती ज्याझ्वः तःजिक हंगु दु । थनया चोडे त्वालय् थनिं नीन्यादँ न्ह्यः नीस्वंगु समूहया रजत जयन्ती ज्याझ्वः शंखधर चोकय् च्वंगु थिमि ब्यांक्वेटय् जूगु खः ।

‘थःगु धर्म संस्कृतियात न्ह्याबलें च्वन्ह्याके नु’ धइगु मू नारा बियाः नीस्वंगु समूहया रजत जयन्ती ज्याझ्वलय् मूपाहांकथं मध्यपुर थिमि नगरपालिकाया प्रमुख सुरेन्द्र श्रेष्ठ झायादीगु खः । ज्याझ्वलय् समूहपाखें लोपोन्मुख नौबाजंया ब्वज्या याःगु खः ।

ज्याझ्वः उलेज्या यासें नगर प्रमुख श्रेष्ठं नगरया संस्कृति सम्पदा संरक्षण यायेमाःगु खँय् बः बियादिसें थुकथंया ज्याय् मानन्धर समुदायं अग्रणी भूमिका म्हिताच्वंगु दु धयादिल । लिसें वय्कलं लोप जुइगु अवस्थाय् थ्यनेधुंकूगु सम्पदा व संस्कृतिया संरक्षण यायेगु अभियानय् स्थानीय सरकारपाखें न्ह्याबलें साथ बियाच्वनीगु नापं ग्वाहालि नं यायेगु प्रतिवद्धता प्वंकादिल ।

विशेष पाहां उपप्रमुख विजयकृष्ण श्रेष्ठं नौबाजंया प्रस्तुति खनाः थः तसकं लय्ताःगु नापं आनन्दित जूगु अनुभव यानागु खँ कनादिसें नगरपालिकां शिक्षा, स्वास्थ्य व रोजगारीया समस्या समाधान यायेगु क्षेत्रय् थःगु ध्यान केन्द्रीत यानाः योजना हयाच्वंगु जानकारी बियादिल ।

ज्याझ्वलय् मध्यपुर थिमि नगरपालिका ५ वडाअध्यक्ष बालकृष्ण श्रेष्ठ, भक्तपुर उद्योग वाणिज्य संघया अध्यक्ष शिवप्रसाद मानन्धर, भक्तपुर इलेक्ट्रोनिक्स व्यवसायी संघया अध्यक्ष गंगाराम मानन्धर, भक्तपुर चेम्बर अफ कमर्सया अध्यक्ष न्हुछेरत्न मानन्धर, नेपाल राष्ट्रिय ज्ञानमाला समिति ख्वप क्षेत्रीय उपसमितिया संयोजक पुण्यरत्न शाक्यं भिंतुना देछासे नुगःखँ तयादीगु खः ।

समूहया नायः रत्नप्रसाद मानन्धरया सभापतित्वय् जूगु ज्याझ्वलय् सचिव पूर्णकुमार मानन्धरं लसकुस यानादगिु खः । ख्वप जिल्ला मानन्धर युवा संघया नायः बाबुकाजी मानन्धरलिसें थीथी संघसंस्थाया प्रतिनिधितय् उपस्थिति दुगु ज्याझ्वलय् सांगीतिक ज्याझ्वः नं न्ह्यब्वःगु खः ।

झीगु नेवाः पुचःया विवेक मानन्धर, ण्डिका घःजू, रञ्जना सितिखु, बाबुकाजी मानन्धर, चनेलाल मानन्धर लगायतं म्येँ न्यंकादीगु खःसा हुलाप्याखं नं न्ह्यब्वःगु खः ।