‘पिने लाःवंम्ह मिसाचा’ उपन्यासयात कयाः अन्तर संवाद

ख्वप(नेपालभाषा टाइम्स)÷पत्रकार कृष्ण प्रजापतिं च्वयादीगु न्हूगु उपन्यास ‘पिने लाःवंम्ह मिसाचा’यात कयाः अन्तर संवाद जुल । श्रेष्ठ सिरपाः त्याकादीधुंकूम्ह च्वमि केवलप्रसाद कायस्थया ब्वनाय् उपन्यासयात कयाः समीक्षालिसें अन्तरक्रिया नं जूगु ज्याझ्वः खः ।

ज्याझ्वलय् मूपाहांकथं झायादीम्ह साहित्यकार तिलकप्रकाश कायस्थं भाषा छगू अमूर्त सम्पदा खः धासें च्वमिपिंसं च्वयेगु इलय् भाषिक एकरुपता कायम यानाः च्वयेमाःगु खँय् बः बियादिल ।

ख्वपया विद्वत व्यक्तित्व ओमचरण अमात्यं सफू च्वयेगु स्वयां वृत्तचित्र व संकिपाया निर्माणं भाषाया प्रचार अप्वः जुइगु खँ कनादिल । संस्कृति अध्ययेता हरिशरण राजोपाध्यायं नेवाःतय्सं थःगु म्हसीकाया निंतिं संस्कृतियात ल्यंका तयेमाःगु खँ धयादिल ।

ज्याझ्वलय् मू वक्ताकथं झायादीम्ह दिपकराज ख्वपं पत्रकार प्रजापतिया न्हूगु उपन्यासयात कयाः समीक्षा यानादीगु खःसा च्वमिलिसें भाषासेवी महेशमान डंगोल, विकल प्रजापति, बाबुकाजी सुवाल लगायतं उपन्यासयात कयाः थःथःगु नुगःखँ तयादीगु खः । साहित्यकार पशुपतिमान पःमांया सभापतित्वय् न्ह्याःगु ज्याझ्वलय् केवलप्रसाद कायस्थं लसकुस यानादीगु खः ।