ने. सं. ११४४ कौलाथ्व तृतीया -

‘पुजाभःया महत्व’यात कयाः प्रवचन ज्याझ्वः

येँ(नेपालभाषा टाइम्स)- नेपाल संवत् न्हूदँ राष्ट्रिय समारोह समिति–११४३या संयोजनय् नेवाः संस्कृतिइ ‘पुजाभःया महत्व’ विषयय् छगू प्रवचन ज्याझ्वः जुल । न्हूदँ समारोह समिति अन्तर्गतया मिसा परिचालन उपसमितिया ग्वसालय् उगु ज्याझ्वः जूगु खः ।

ज्याझ्वलय् समारोह समितिया नायःलिसें बौद्ध विद्वान प्रा. डा. नरेशमान वज्राचार्यं नेवाः धर्म संस्कृतिइ पुजाभःया महत्वया विषययात कयाः प्रवचन बियादीगु खः । ज्याझ्वलय् वय्कलं नेवाः धर्म संस्कृतिइ चिचिधंगु निसें ततःधंगु पुजा व जन्मनिसें मृत्यु संस्कारय् तक ग्वःताजिकथंया पुजाभः तयेगु चलन दु धइगु बारे कनादीगु खः । लिसें वय्कलं पुजाभलय् दइगु थीथी ताजि स्वां, सिन्हः, जाकि, नैवेद्यः, जल, धुँ धुपाँय्, इताः, समय्बजि, जजंका, क्वखा आदिया महत्व व थुपिं ज्वलनं छुकिया संकेत याइ धइगु बारे नं सचित्र प्रवचन बियादीगु खः ।

नेपाल परम्परागत बौद्ध धर्म संघया नायःलिसें नेपाल वज्रयान महाविहार लुम्बिनीया चक्रेश्वर तकं जुयादीम्ह प्रा. डा. वज्राचार्यं पुजाभः तयेबलय् मदयेक मगाःगु ज्वलं व मतसें मगाः ज्वलंया बारे नं विस्तृत रुपं जानकारी बियादीगु खः ।

समितिया नायः प्रा.डा. वज्राचार्यया हे सभापतित्वय् जूगु ज्याझ्वलय् समितिया सचिवालय कजि सुजिव वज्राचार्यं लसकुस यानादीगु खःसा मिसा परिचालन उपसमितिया कजि नानीहिरा महर्जनं ज्याझ्वःया उद्देश्य बारे कनादीगु खः । समितिया दुजः हेराशोभा महर्जनं सुभाय् देछानादीगु खः ।