जन संगीत स्रष्टा उपाधीं अमरराज सम्मानित

येँ – संगीतज्ञ अमरराज शर्मा राजोपाध्याययात नागरिक स्तरं तःजिगु सम्मान याःगु दु । सुगम संगीतया लिसें प्रगतिशील संगीतया माध्यमं देय्या राजनैतिक हिउपालय् तकं योगदान ब्यूम्ह संगीतज्ञ शर्मायात जनसंगीत स्रष्टा उपाधीलिसें नागरिक अभिनन्दन याःगु खः ।
वरिष्ठ संगीत स्रष्टा अमरराज सम्मान समारोह समितिपाखें येँय् ग्वसाः ग्वःगु ज्याझ्वलय् समितिया ल्यू कजि आकाश राजोपाध्यायं खादा क्वखायेकादिलसा कजि बिराजकाजी राजोपाध्यायं दोसल्ला न्ययेकाः हनादिल । अथे हे, जनकवि दुर्गालाल श्रेष्ठं हनापौ लःल्हानादिल । अथेहे नगद सम्मान निगू लाख व न्यय्द्वः तकाया चेक महर्जन बिजनेस एशोसिएट्सया नायः, समाजसेवी कृष्णलाल महर्जनं लःल्हानादिल ।

सम्मानित व्यक्तित्व शर्मां सम्मान लःल्हानाकासें थुगु सम्मानं थःत न्हूगु अले स्तरीय श्रृजनाया निंतिं थप उर्जाशील दयेकूगुलिसें थःत जिम्मेवारी थप जूगु महसूस जुयाच्वंगु धयादिल ।

जनकवि श्रेष्ठं अमरराज अमर गायक जूगु खँ न्ह्यथँसें प्रतिभाया सम्मान याइगु जाति, समाज व राष्ट्रया गलबें नं मृत्यु जुइमखु धयादिल ।
समितिया कजि बिराजकाजी राजोपाध्यायं देय्या सम्पत्ति धयातःपिं कलाकारतय्त राष्ट्रं पाय्छि संरक्षण मयाः धयादिल । देय्या राजनैतीक ह्यूपाःया लागी योगदान बिउपिं गुलिखे प्रगतिशील संगीत साधकपिनिगु पाय्छि मूल्याङ्कन राज्यं यायेमाःगुलिइ वय्कलं बः बियादिल ।

ज्याझ्वलय् म्येहालामि, संगीतकार अमरराजया निचाः सिडि एल्बमया नं उलेज्या जूगु खः । उलेज्या जूगु एल्बम अजर अमर १य् जन संगीत स्रष्टा शर्माया याकःसः दुथ्याःनाच्वंगु दुसा अजर अमर २ स याकः संगीत दुथ्याः । उगु हे ज्याझ्वलय् शर्माया किपा दुगु टिसर्ट नं सार्वजनिक याःगु खः ।

शर्माया बारे च्व्यातःगु सफू नं याकनं सार्वजनिक यायेगु घोषणा यासें ज्याझ्वलय् उगु सफूया द्यवः नं सार्वजनिक याःगु खः ।
ज्याझ्वलय् थीथी संघसंस्था व व्यक्तिपाखें नं जनसंगीत स्रष्टायात हंगु खः । जनसंगीत स्रष्टा शर्माया याकः सनिलया रुपं ग्वसाः ग्वःगु ज्याझ्वलय् शर्मां प्रगतिशील लिसें थीथी लोक, आधुनिक म्येत नं न्ह्यब्वयादिल । प्रगतिशील म्ये न्ह्यब्वयेगु झ्वलय् शर्मायात वदन शर्मा राजोपाध्याय व शैलेस प्रधानं साथ बियादीगु खः । लिसें सानुबाबु महर्जन, सुरज व्यञ्जनकार, सुरजबीर बज्राचार्य, दीपा महर्जन, धनबहादुर गोपाली, पवित्र कसाः, अन्जन श्रेष्ठ, पंकज राजोपाध्याय, भुपेन्द्र बज्राचार्यं शर्माया संगीतय् म्ये हालाः न्ह्यब्वयादीगु खः ।

छगू इलय् अतिकं लोकं ह्वाःगु शर्मां मुनाः संगीतवद्ध यानादीगु नेवाः लोक ¥याप यःबाबा छ बाबाय् दयेकातःगु हुलाप्याखं नं करिब निगू दशक धुंकाः हाकनं थुगु हे मञ्चय् न्ह्यब्वःगु खः ।

सम्मानित शर्मा प्यंगू दशक स्वयां न्ह्यवनिसें आधुनिकया लिसें सुगम संगीत ख्यलय् निरन्तर सक्रिय दु । शर्माया भोलि फेरी सल्लाघारीमा, झमक्क साँझ पर्दाया लिसें नेपालभाषाया यः बाबा छ बाबा, निभाः लुइवं, ग्वाहालि रे ग्वाहालि लिसेंया म्येत लोकंह्वाः ।

सम्बन्धित बुखँ

LEAVE YOUR COMMENTS