सांसद चौधरीया कैद मिनाहा जुइगु
येँ (नेपालभाषा टाइम्स)÷कैद सजाय फया–च्वंम्ह नागरिक उन्मुक्ति पार्टीया सांसद अरुण चौधरीयात माफी बीत राष्ट्रपतियात सरकारं सिफारिस याःगु दु । गृह मन्त्रालयया प्रस्ताव लिपा मन्त्रिपरिषदं सांसद चौधरीया ल्यं दनिगु सजाय मिनाहाया नितिं राष्ट्रपतियात सिफारिस याःगु खः ।
गृह मन्त्रालयया नं जिम्मेवारी कयाच्वंम्ह प्रधानमन्त्री पुष्पकमल दाहालं हे चौधरीया सजाय मिनाहाया नितिं कुतः यानादीगु खः । वयां लिपा मन्त्रिपरिषदं ल्यं दनिगु सजाय मिनाहाया नितिं राष्ट्रपतियात सिफारिस यायेगु निर्णय याःगु खः ।
थ्व स्वयां न्ह्यः गृह मन्त्रालयं चौधरीयात लानाच्वंगु कसुरया अवस्थायात कयाः महान्यायाधिवक्ता कार्यालययाके राय फ्वंगु खः । महान्यायाधिवक्ताया कार्यालयं गाडीइ मि तयेगु सम्बन्धी कसुरय् लानाच्वंम्ह सांसद चौधरीया ल्यं दनिगु सजाय मिनाहा यायेफइगु राय सरकारयात बिउगु खः । उकिया हे आधारय् सरकारं कैद मिनाहाया निर्णय यासें राष्ट्रपति कार्यालयय् छ्वया बिउगु खः ।
झिंस्वदँ न्ह्यः कुटपिट व आगजनीया घटनाय् अदालतं दोषी ठहर जुयाः कैद व जरिवाना भुक्तान याये ल्यंदनिम्ह चौधरी प्रतिनिधिसभाया सांसद जुइधुंकाः प्रहरीं ज्वंगु खः । वंगु चुनावय् नागरिक उन्मुक्ति पार्टीपाखें वय्कः कैलाली–२ प्रतिनिधिसभाया दुजलय् निर्वाचित जूगु खः ।
LEAVE YOUR COMMENTS