‘थ्व सरकारलिसे वार्ता जुइ मखु’
येँ – नेत्र विक्रम चन्द ‘विप्लव’ या पार्टीं वार्ताया नितिं थःपिं तयार दुसां वर्तमान सरकारलिसे धाःसा वार्ता मयायेगु खँ धाःगु दु । चन्द पुचःया पूर्वीकमाण्ड इञ्चार्ज अनिल शर्मा विरहीं अनलाइन खबरलिसे खँ ल्हासें प्रधानमन्त्री केपी ओली व गृहमन्त्री रामबहादुर थापा बादल नेतृत्वया सरकारलिसे वार्ता याये मफइगु खँ धयादीगु खः ।
थःपिं वार्ता विरोधी मखु धासें वय्कलं प्रम ओली व गृहमन्त्री थापाया नियत हे शंकास्पद जूगुलिं उपिंलिसे वार्ता मयायेगु खँ धयादीगु दु । वय्कलं ओली व थापां थःपिंलिसे वार्ता हे चाहे मजूगु दावी यासें सरकारं वार्ताया निंतिं औपचारिक वा अनौपचारिक कुतः मयाःगु द्वपं नं बियादिल ।
सरकार धात्थें थःपिंलिसे वार्ता याये चाहे जूगु खःसा सञ्चारकर्मी, अधिकारकर्मी कानून व्यवसायी वा नागरिक समाजया ग्वाहालि काये फइ धासें अज्याःगु कुतः मयाःगु धइगु हे सरकार थःपिंलिसे वार्ता याये चाहे मजूगुया दसु खः धकाः नं वय्कलं कनादिल । लिसें वय्कलं सरकारं पार्टीया छम्ह साधारण कार्यकर्तायात वार्ताया नामय् आत्मसमर्पण याः वा धइगु सन्देश प्रवाह यानाच्वंगु द्वपं बिसें धयादिल, ‘सरकारं सु लिसे वार्ता याये चाहे जूगु खः, छुं धाःगु मदु ।’
थ्व स्वयां न्ह्यः वार्ताया तयारी जुयाच्वंगु इलय् खड्ग बहादुर विश्वकर्मा ‘प्रकाण्ड’यात ज्वंगु व लिपा हानं वार्ता पुचः नीस्वंगु इलय् उमा भुजेलयात ज्वंगु धासें वार्ताया चर्चा यानाः नेतायात ज्वंगुलिं सरकार वार्ताया पक्षय् मदुगु सीदु धकाः नं वय्कलं दावी यानादिल ।
मेखे प्रधानमन्त्री ओलीं विप्लव पुचःयात शान्तिपूर्ण लँपुइ वयेत चैत मसान्त तकया अल्टिमेटम बियादीगु दु । सोमवाः पार्टीया संसदीय दलया बैठकय् न्ववासें ओलीं चैतया दुने हिंसा त्याग यानागु घोषणा सहित मवल धाःसा विप्लवया फुक्कं नेता कार्यकर्तायात नियन्त्रणय् कायेगु ख्याच्वः बियादीगु खः ।
LEAVE YOUR COMMENTS