ने. सं. ११४६ तछलाथ्व पारू -

येँ महानगर आः साक्षर महानगर

येँ – येँ महानगर नं साक्षर नगर जूगु दु । वंगु सोमवाः येँ महानगरयात साक्षर नगर घोषणा याःगु खः । थनया भृकुटीमण्डपय् च्वंगु पद्मोदय माध्यमिक विद्यालयय् छगू औपचारिक ज्याझ्वः यासें येँ महानगरयात साक्षर नगर घोषणा याःगु खः । पद्मोदयय् जूगु औपचारिक ज्याझ्वलय् येँ महानगरयात ‘सांस्कृतिक सहर, साक्षर काठमाडौं महानगर’ घोषणा याःगु खः ।

केन्द्रीय तथ्यांक विभागयाकथं ०६८ सालया तथ्यांककथं येँ महानगरय् ८८.५२ प्रतिशत साक्षर दुगु खः । आःया इलय् येँ महानगरया साक्षरता प्रतिशत ९६.६० दु । स्थायी बसोबास यानाच्वंपिं १५ दँनिसें ६० दँ दुपिं ९५ प्रतिशत स्वयां अप्वः दत धाःसा साक्षर घोषणा याइगु खः ।

ज्याझ्वलय् नवासें येँ महानगर प्रमुख विद्यासुन्दर शाक्यं थगुने फागुन महिनाय् हे साक्षर नगर घोषणा यायेगु ज्याझ्वः दुगु खःसां उगु इलय् कोरोना भाइरसया महामारीया कारणं लिछ्यायेमाःगु खः धयादिल । लिसें वय्कलं साक्षरतायात शतप्रतिशत थ्यंकेत थःपिंसं बः बीगु जुइ नं धयादिल ।

‘जिमिसं आःया प्रगतियात अप्वयेका यंकेगु जुइ । साक्षरता प्रतिशत अप्वयेकेत सामुदायिक सिकाइ केन्द्रया ल्याः थप यानाः निरक्षरयात साक्षर याना यंकेगु जुइ’ महानगर प्रमुख शाक्यं धयादिल, ‘उकिया निंतिं जिमिसं नीति व बजेटया नं व्यवस्था यानागु दु ।’ गुलिखे ज्याझ्वःया लिच्वः लिपा जक वइ धासें वय्कलं थःपिंसं शिक्षाय् यानागु लगानीया भविष्यय् लिच्वः बांलाक वइ धइगु खँय् आशावादी जुयाच्वना धयादिल ।

महानगर उपप्रमुख हरिप्रभा खड्गी श्रेष्ठं साक्षरताय् प्रगति जुलकि सहरी विकासया सूचकय् छगू तःधंगु हे हिउपाः वइ धासें साक्षर जूपिंत साक्षरोत्तर ज्याझ्वः संचालन यायेमाःगु व उकिया निंतिं महानगरं ज्या याइ धयादिल ।

जिल्ला समन्वय समिति येँया प्रमुख शिवसुन्दर राजवैद्यं ०७७ साल चैत मसान्त दुने बागमति प्रदेशयात हे साक्षर प्रदेश दयेकेगु योजना दुगु खःसां काभिडया कारणं लक्षित इलय् घोषणा याये मफुगु खँ कनादिल । लिसें वय्कलं मेमेगु पालिकात नं साक्षर नगर घोषणा यायेगु अभियानय् दुगु जानकारी बियादिल ।

ज्याझ्वलय् शिक्षा अधिकारी रामप्रसाद सुवेदी, शिक्षा समन्वय इकाइ प्रमुख नन्दलाल पौडेल, शिक्षा अधिकृत मोति भट्टराई लगायतया वक्तातय्सं साक्षर व्यक्तितय्सं व्यतित यानाच्वंगु स्तरीय जीवनयात थप प्रगतिया सूचकया रुपय् कायेमाःगु खँ धयादीगु खः ।

येँ महानगरया ३२ गू वडामध्ये दकलय् अप्वः साक्षरता दुगु वडा १०, २८ व ३० खः । थुपिं स्वंगू वडाया साक्षरता प्रतिशत ९९ दु । दकलय् म्हो साक्षरता दुगु वडा १४ खः । थुगु वडाय् ९० प्रतिशतया ल्याखय् साक्षरता दु ।

महानगरया शिक्षा विभागयाकथं वडा नं. २, ७, ११, २७ य् साक्षरता ९८ प्रतिशत दु । वडा ३ व १६ य् ९७ प्रतिशत, १३ वडाय् ९७.४६ प्रतिशत, वडा १, ५, ६, १७, १९ व २४य् ९६ प्रतिशत, वडा ८, ९, २१, २६, २९ व ३१ य् ९५ प्रतिशत, २० वडाय् ९५.२५ व वडा ३२ य् ९५.५ प्रतिशत साक्षर दु ।