लछि लिपा प्रदेशया नां व राजधानी

येँ – प्रदेश ३ या मुख्यमन्त्री डोरमणि पौडेलं लछिया दुने प्रदेशया स्थायी राजधानी व नां क्वःछीगु खँ कनादीगु दु । म्हिगः चितवनय् पत्रकारतलिसे खँ ल्हासें वय्कलं उगु खँ धयादीगु खः । वय्कलं प्रदेश राजधानीया विषय संसदय् दुहां वनेधुंकूगुलिं स्वन्ति लिपा च्वनीगु बैठकं थुकिया बारे निर्णय जुइगु खँ कनादीगु खः ।

वय्कलं प्रदेशया नांया विषयय् गुगुं नं कथंया प्रस्ताव मवःगु धासें नांया बारे तःधंगु विवाद मदुगु दावी यानादिल । प्रदेशया राजधानी व नां क्वःछीगु थाकुगु खँ मखु धासें थ्व ज्याय् थःपिं हे हथाय् मचायागु खँ नं वय्कलं कनादिल । प्रदेशं छगू निर्णय यायेगु लँपु ज्वनेधुंकूगुलिं आशंका मयायेत नं वय्कलं इनाप यानादिल ।