५५ गू नेवाः सञ्चार माध्यमयात हना
किपू- नेवाः भासं समाचार, ज्याझ्वः प्रकाशन–प्रशारण याना वयाच्वंगु न्यय्न्यागू संचार गृहयात शनिवाः छगू ज्याझ्वःया दथुइ सम्मानित यात । नेपालभाषा एकेदेमिपाखें न्ह्याका वयाच्वंगु नेवाः एफएम १०६.६ मेगाहर्ज झिंस्वदँय् क्यंगु लसताय् थ्व हना ज्याझ्वः जूगु खः ।
एफएम संचालन याना वयाच्वंगु अनक मिडिया प्रा.लि.पाखें थ्व हना ज्याझ्वः याःगु खः । ज्याझ्वलय् मूपाहां वाङ्मय शताब्दी पुरुष सत्यमोहन जोशीं नेवाः भासं समाचार प्रकाशन प्रशारण याना वयाच्वंगु पत्रिका, अनलाइन, एफएम, टेलिभिजनतय्त हनापौ लःल्हानादीगु खः ।
ज्याझ्वलय् न्ववानादिसें नेपालभाषा एकेदेमिया संरक्षक वाङमय शताब्दीपुरुष जोशीं एकेदेमिं संचालन यानाच्वंगु एफएम न्ह्याकेगु निंतिं आर्थिक समस्या जुयाच्वंगु इलय् अनक मिडियापाखें व्यवसायी श्रीराम महर्जन व वय्कःया छेँजःपिंसं नेवाःभाय् एफएम म्वाका तयेमाः धकाः संचालनया जिम्मा कयाः नेपालभाषा ख्यलय् तःधंगु गुण याःगु खँ कनादिल । वय्कःपिंसं छुं लबः कायेगु निंतिं एफएम संचालन याःगु मखुसें नेपालभाषाया माध्यमं संचालन जुइगु छगू जक एफएम हलिंन्यंकं थ्यनेमाः धकाः थ्व जिम्मा काःगु खँ वय्कलं धयादिल ।
अथेहे येँ क्षेत्र नं. १० या सांसद राजेन्द्र केसीं जाति धयागु म्ह खःसा भाय् धयागु आत्मा खः धासें भाषा मदयेक जातिया अस्तित्व दइ मखु धयादिल । नेपालय् थीथी इलय् जुयाच्वंगु आन्दोलनय् किपुलिं तःधंगु भूमिका म्हिताच्वंगु दु धासें आः नेपालभाषा आन्दोलनय् नं किपुलिं नेतृत्वदायी भूमिका म्हितीगु विश्वास वय्कलं प्वंकादिल । ज्याझ्वलय् थीथी साँस्कृतिक ब्वज्या नं जूगु खः ।
LEAVE YOUR COMMENTS