पत्रकारतपाखें प्रदर्शन

येँ (नेपालभाषा टाइम्स) – सञ्चार गृहपाखे पीडित जूपिं पत्रकार व कर्मचारीतय्त सरकारं मालेमाःगु धासें म्हिगः भू थानाः बालुवाटारय् प्रदर्शन याःगु दु । नेपाल पत्रकार महासंघया श्रमजीवि हित प्रवद्र्धन समिति व सञ्चार गृहया पीडित पत्रकार-कर्मचारी संयुक्त संघर्ष समितिया ग्वसालय् प्रधानमन्त्री निवास बालुवाटार न्ह्यःने प्रदर्शन याःगु खः । श्रमजीवि पत्रकार ऐन कार्यान्वयन मजूगु व सञ्चालकपिंपाखे पात्रकार लिसें कर्मचारीयात महामारीया इलय् थप मारय् लाकूगु तर सरकारं धाःसा कानुन कार्यान्वयनय् माःगु चिउताः मक्यंगु धासें पत्रकार व कर्मचारीतय्सं प्रर्दशन याःगु खः । प्रदर्शनया झ्वलय् कानुन माने मयाइपिं सञ्चार गृहया सूचि सार्वजनिक यानाः सरकारी विज्ञापन पनेमाःगु व उमित विदेश भ्रमणय् नं वने मबिउसें सञ्चार गृहयात कारबाही यायेमाःगु माग याःगु खः ।