भाषा विधेयकया मस्यौदा लःल्हात

येँ (नेपालभाषा टाइम्स)-बागमति प्रदेशय् नेपालभाषा व तामाङ भाषायात नं ज्याखँया भाषाकथं मान्यता बीगु लागिं तयार याःगु कानूनया मस्यौदा म्हिगः मुख्यमन्त्री शालिकराम जम्मरकट्टेलयात लःल्हात ।

उगु कानूनया मस्यौदायात पूर्ण रुप बीगु लागिं सरकारं गठन याःगु कार्यदलं म्हिगः उगु मस्यौदा लःल्हाःगु खः । कार्यदलया संयोजक लिसें प्रदेश सरकारया सामाजिक मन्त्री कुमारी मोक्तानं मुख्यमन्त्री जम्मरकट्टेलयात उगु मस्यौदा लःल्हानादीगु खः । उगु इलय् कार्यदलया निम्ह दुजःपिं डा. अमृत योन्जन व डा.ओमकारेश्वर श्रेष्ठ नं दीगु खः ।

मस्यौदा लःल्हाना कासें मुख्यमन्त्री जम्मरकट्टेलं थ्व मस्यौदायात फयांफछि आः च्वनीगु प्रदेश सभाया बैठकय् हे विधेयकया रुपय् पेश यायेगु खँ कनादिल । थ्व विधेयक सरकारया संस्कृति तथा पर्यटनमन्त्रीं पेश यायेमाःगु खःसां थौंकन्हय् थ्व मन्त्रालय खाली जुयाच्वंगु कारणं मुख्यमन्त्री थम्हं हे सदनय् पेश याइगु खँ धाःगु दु ।

कार्यदलया दुजः डा. ओमकारेश्वर श्रेष्ठं ‘नेपालभाषा टाइम्स’ यात कनादी कथं सदनय् पेश याये न्ह्यः सरकारं प्रदेशया कानून मन्त्रालय व अर्थ मन्त्रालयया राय कायेगु ज्या याइ । अनं याकनं स्वीकृत जुयाः वल धाःसा विधेयक याकनं पेश याये फइ ।

कार्यदलं गज्याःगु मस्यौदा तयार याःगु खः सरकारं उकी छुं हे संशोधन मयासे गथे खः अथे हे विधेयक पेश यायेत्यंगु खँ नं डा. श्रेष्ठं कनादिल ।

थ्व विधेयक पारित जुइवं हे स्वलाया दुने सरकारं भाषा विकास प्रतिष्ठान गठन यायेमाःगु व्यवस्था दु । पारित जूगु कानूनयात कार्यान्वयन यायेगु लागिं माःगु ज्या थ्वहे प्रतिष्ठानं याइगु खँ धाःगु दु । बागमति प्रदेशय् थ्व कानून वयेवं मेमेगु प्रदेशय् नं अःपुइगु खँ नं धाःगु दु ।

मेमेगु दलतय्सं छु याइ ?
बागमति प्रदेशय् खस नेपालीया नापनापं नेपालभाषा व तामाङ भाषायात नं सरकारी ज्याखँया भाषा कथं मान्यता बीकेत हयेत्यंगु थ्व विधेयक पारित यायेगु लागिं सरकारया सामान्य बहुमत जक दुसां गाः । अथे खःसां थुकियात सर्वसम्मत ढंगं पारित याकेगु लागिं बागमति प्रदेशय् दुथ्याःगु मेमेगु राजनीतिक दलतय्गु नं समर्थन कायेगु लागिं कुतः यायेमाःगु खँ धयाहःगु दु ।

थ्व दल विशेष सिबें नं संविधानया मर्म कथं जाति भाषायात अधिकार बिया यंकीगु कानून जूगु कारणं थुकी फुकसिया अपनत्व दयेमाःगु जुयाः फुक्क दलया सहमति आवश्यक जुइगु खँ धाःगु दु । बागमति प्रदेश सरकारय् दुथ्याःगु माओवादी केन्द्र, नेपाली कांग्रेस, जसपापाखें थुकी समर्थन याःसां नेकपा (एमाले), नेमकिपा व राप्रपाया नं समर्थन दत धाःसा कार्यान्वयन याना यंकेत अझ अःपुइगु खँ धयाहःगु दु ।

लिसें कानून पारित हे जूसां उकियात कार्यान्वयन यायेगु लागिं नेवाः व तामाङ संघ संस्थात नं सक्रिय जुइ मालीगु खँ धाःगु दु । नेपालय् कानून दुसां कार्यान्वयन फ्यासुइगु कारणं समुदाय सक्रिय जुइमाःगु खँ धाःगु दु ।