लकडाउनय् नं येँय् वये–वने याइपिं दनि

येँ – कोरोना नियन्त्रणया लागिं याःगु लकडाउनया इलय् नं राजधानी त्वःताः पिहां वनीपिं व पिनें राजधानी दुहां वइपिनि क्रम धाःसा जारी हे जुयाच्वंगु दनि ।

.ट्राफिक प्रहरीं बिउगु जानकारी कथं म्हिगः जक ४ हजार ४६६ गः सवारी साधान स्वनिगः दुहां वःगु दुसा ४ हजार ८९५ गः सवारी साधन स्वनिगः त्वःताः पिहां वंगु दु । म्हिगः न्हिनय् तकया दुने १० हजार स्वयां अप्वः मनूत स्वनिगलय् दुहां वःगु व १५ हजार स्वयां अप्वः मनूत स्वनिगः त्वःताः पिहां वंगु खँ नं ट्राफिक प्रहरीं धाःगु दु ।

स्वनिगः दुने अत्यावश्यक ज्याय् वःगु सवारी साधन जक चले जुइ खनी धाःसां स्वनिगः पिनें तकं उकिं हे सवारी साधन दुहां वयाच्वंगु खनाः मनूत अजू चायाच्वंगु दु ।

स्वनिगः दुहां वइगु गुलिखे सवारी साधनय् सरकारी नम्बर प्लेट समेत लानाच्वंगु खँ नं धाःगु दु । थ्वहे इलय् इहिपाया लगन नं यक्व दुगु जुयाः लँय् इहिपाया ब्यानर तयाः चले यानाच्वंगु सवारी साधनत नं यक्व हे लूगु दु । ट्राफिक प्रहरीं उमित गाडीया न्ह्यःने तिकातःगु ब्यानर छगूया भरय् त्वःताच्वंगु खँ धाःगु दु ।

मेखे राजधानी येँय् आधिकारिक पास मज्वँसे चले यानाच्वंगु आपालं सवारी साधन ट्राफिकं ज्वनाः होल्डिङय् तया बिउगु दु । येँया वानेश्वर, कालिमाटी, सोह्रखुट्टे, दरवारमार्ग, न्हू सतक आदि लागाय् अज्याःगु सवारी साधन ज्वनाः होल्डिङय् तया बिउगु खः । म्हिगःनिसें किपुली नं पास मदुगु सवारी साधन ज्वनाः होल्डिङय् तयेगु ज्या जूगु खँ धाःगु दु ।
म्हिगः न्हिनय् तकया दुने येँया थीथी थासय् यानाः द्वःछिगः स्वयां अप्वः सवारी साधन ज्वनाः होल्डिङय् तया बिउगु खः ।
लकडाउनय् नं स्वनिगःया थीथी थासय् यक्व सवारी साधन चले जूगु खने दत धकाः म्हिगःनिसें ट्राफिक प्रहरीं नियन्त्रणयात कडा यासें पास मदुगु सवारी साधन ज्वनेगु क्रम तच्वयेकूगु खः ।

सम्बन्धित बुखँ

LEAVE YOUR COMMENTS