मोटरसाइकलया नं प्रदूषण परीक्षण मयाःतले वायु स्वच्छ जुइमखु

येँ – स्वनिगलय् गुडे जुइगु मोटरसाइकलया नं प्रदूषण जाँच मयाःतले स्वच्छ वायु चूलाइमखुगु खँ धाःगु दु । स्वनिगलय् चले जुइगु सवारी साधन मध्ये ८० प्रतिशत मोटरसाइकल जुयाच्वंगु दु । सवारी परीक्षण कार्यालयया प्रमुख रामचन्द्र पौडेलं मोटरसाइकलया नं परीक्षण यायेगु नीतिगत व कानुनी व्यवस्था मदयेकं तःतःधंगु सहरया वातावरणया अवस्थाय् सुधार मवइगु खँ धयादीगु खः ।

सवारी साधनं वइगु कुं यानाः स्वनिगः लिसें ततःधंगु सहरया वातावरण तसकं प्रदूषित जुयाच्वंगु दु । तर थज्याःगु सवारी साधनया प्रदूषण परीक्षण याइगु बांलाःगु वर्कशप तकं मदु । अथे जूगुलिं सरकारं मोटरसाइकल बाहेक मेगु सवारी साधनय् यानाच्वंगु परीक्षण नं औपचारिक जक जुयाच्वंगु दु ।

भाजु पौडेलया कथं छक्वः परीक्षण यानाः वाउँगु स्टिकर कयातयेधुंकूगु गाडी मध्ये नं हाकनं परीक्षण यायेबलय् डिजेल पाखें चले जुइगु सवारी साधन ४० प्रतिशत व पेट्रोलपाखें चले जुइगु सवारी साधन ३० प्रतिशत फेल जुइगु जुयाच्वंगु दु ।

ट्राफिक प्रहरीं वंगु चैतया अन्तिम वालंनिसें वाउँगु स्टिकर तयातःगु सवारी साधनया नं प्रदूषण परीक्षण सुरु याःगु खः । हाकुगु प्लेट दुगु सवारी साधनतय्सं धाःसा ‘रुट इजाजत’ कायेगु निंतिं नं खुलाय् छक्वः जाँचपास यायेमाःगु नियम दु ।

सम्बन्धित बुखँ

LEAVE YOUR COMMENTS