ने. सं. ११४४ कौलाथ्व चौथी -

मनपां नेपालभाषा विषयया अनुगमन याइगु

येँ (नेपालभाषा टाइम्स)- येँ महानगरपालिका दुनेया फुक्कं स्कुलय् मनपां ब्वंकेगु शुरु याःगु नेपालभाषा विषयया पठनपाठन गय् गथे जुयाच्वन धकाः आः अनुगमन याइगु जूगु दु ।

येँ मनपाय् न्हूगु नेतृत्व वयेधुंकाः महानगर दुनेया गुलिखे निजी स्कुलतय्सं नेपालभाषा विषय लिकया हल धइगु खँ पिहां वःगुलिं महानगरया शिक्षा विभागं आः कडा अनुगमन यानाः फुक्क हे स्कुलय् नेपालभाषा अनिवार्य याकेगु लागिं थ्व अनुगमन यायेत्यंगु खः ।

म्हिगः शिक्षा समितिया ज्याकुथिइ च्वंगु अनुगमन व सहजीकरण समितिया बैठक न्ववासें शिक्षा विभाग प्रमुख रामप्रसाद सुवेदीं धयादिल, ‘उकुन्हु जिमिसं स्कुलतय्त थ्व विषयय् ब्वंकेगु व्यवस्था यानादिसँ धकाः इनाप यानाच्वनागु खः, आः चाहिँ अनिवार्य रुपं न्ह्याथे यानाः नं ब्वंके हे माः धकाः कडाइ यायेत्यनागु दु ।’

न्हापा हे गठन याना तःगु अनुगमन समितियात हे आः हानं सक्रिय यानाः कन्हय्निसें फुक्क हे निजी स्कुलय् अनुगमन याकेगु खँ नं वय्कलं कनादिल । छुं स्कुलतय्सं हेलचेक्राइ यानाः थ्व विषय लिकाःगु व गनं चाहिँ नां जक ब्वंकेगु यानाच्वंगु खँ नं थःपिंसं न्यनागु धासें आः अथे याइपिंत छुट मबीगु खँ नं वय्कलं कनादिल ।

आः फुक्क हे स्कुलतय्सं नेपालभाषा विषयया जाँच काये हे माःगु व ८ तगिंया जाँचया लागिं येँ महानगरपालिकां हे न्ह्यसःपौ तयार यानाः छ्वयेगु तयारी नं जुयाच्वंगु दु । मनपाया शिक्षा विभागं तयार यानाः छ्वःगु न्ह्यसःपौया जाँच काये हे माःगु व उगु न्ह्यसःपौया जाँच नं शिक्षा विभाग थम्हं हे यायेगु व्यवस्था जुइगु खँ नं वय्कलं कनादिल । थुकिया लागिं शिक्षा विभागं आवश्यक गृहकार्य नं शुरु यायेधुंकूगु दु ।