रेडक्रस दिवस नेपालय् भद्रगोल

येँ – थौं अन्तर्राष्ट्रिय रेडक्रस दिवस । विश्वन्यंकं च्वंपिं रेडक्रसकर्मीत रेडक्रस दिवस हनाच्वंगु इलय् नेपाःया रेडक्रसकर्मीत धाःसा सीडीओया ज्याकुथी वनाः बयान बी माःगु अवस्था वयाच्वंगु दु । नेपाल रेडक्रस सोसाइटी दुने ब्वलनाच्वंगु आन्तरिक कचवंया कारणं अन्ततः धरानय् म्हीगंनिसें शुरु जुइ माःगु थ्व अधिवेशन विरुद्ध उजुरी लाःगुलिं येँया सीडीओ ज्याकुथिं अन्तिम इलय् वयाः अधिवेशन स्थगित यायेत निर्देशन बिउगु खः ।

रेडक्रसं थःपिनि लागिं न्याना काःगु जग्गाय् लखौं तका हिनामिना याःगु बारे रेडक्रसया पदाधिकारीतय् विरुद्ध उजुरी लायेवं थ्व विवाद ब्वलंगु खँ धाःगु दु । रेडक्रसया कार्यसमितिं धाःसा अन्तिम इलय् वयाः अधिवेशन स्थगित याःगु विरुद्ध थःपिं अदालत वनेगु ख्याच्वः बिउगु दु ।

थ्वहे झ्वलय् नेपाल रेडक्रसया गण–बहाल शाखां थौं बसन्तपुली छगू ज्याझ्वः यासें अन्तर्राष्ट्रिय रेडक्रस दिवस हनीगु जूगु दु । बसन्तपुली थौं हिदान व ब्वज्या यासें थ्व दिवस हनेत्यंगु खः । आन्तरिक कचवनं यानाः केन्द्रपाखें याये माःगु दिवस हनाया ज्याझ्वः धाःसा भद्रगोल जूवंगु खँ धाःगु दु ।