ने. सं. ११४६ चिल्लागा द्वादशी - महाकवि गिरिजाप्रसाद जाेशिया बुन्हि

बलात्कार कानुनय् न्ह्यसः

येँ (नेपालभाषा टाइम्स)- देशय् विद्यमान बलात्कार सम्बन्धी कानुनय् संशोधन यायेमाःगु बिचाः सांसदतय्सं न्ह्यःने हःगु दु । प्रतिनिधिसभाया कानुन न्याय तथा मानव अधिकार समितिया म्हिगः च्वंगु बैठकय् थौंकन्हय् उमेर मगाःपिं मिसा मस्तय्त बलात्कार यात धइगु द्वपं बियाः आपालं मुद्दात वयाच्वंगु खँयात न्ह्यःने तसें जबर्जस्ती करणी सम्बन्धी कानुनयात परिमार्जन यायेमाःगु बिचाः पिहां वःगु खः ।

खास यानाः मिसा व मिजं निम्हं उमेर मगाःनिपिं खःसा उमि दथुइ सहमतिइ यौन स्वापू तयेगु ज्या जुल धाःसा उकियात बलात्कार धायेगु लाकि मधायेगु धइगु सवालय् तःधंगु अन्यौल दयाच्वंगु बारे चर्चा जूगु खः । थज्याःगु केशय् मिजंयात बलात्कारया द्वपं बियाः सजाय बीगु यानाच्वंगु कारणं विराटनरगर, वीरगञ्ज, बाँकेया बाल सुधारगृहय् यक्व मिजं मस्तय्त तये हये माःगु अवस्था वयाच्वन धकाः चर्चा जूगु खः ।
समितिया बैठकय् थःगु बिचाः तसें रास्वपाया सांसद सोभिता गौतमं १८ दँ स्वयां क्वय्यापिं मिसा व मिजं दथुइ यौन स्वापू कायम जूवन धाःसा वयात बलात्कार धायेगु लाकि मयायेगु धइगु खँय् न्ह्यसः पिहां वइगु खँ कनादिल ।

माओवादी सांसद रामकुमार राईं देशय् विद्यमान थ्व कानुनं यानाः बालविवाह सम्बन्धी मुद्दा फुक्क हे बलात्कारया मुद्दाय् परिणत जुयाच्वंगु दु धयादिल । अथे हे एमालेया सांसद प्रतिक्षा तिवारीं समझदारीइ जूगु शारीरिक स्वापूयात बलात्कार दयेकाच्वंगु कारणं मिसामिजं दथुइ खँ मिले जुत्तले चमत्कार, खँ मिले मजुइवं बलात्कार जुइगु अवस्था वयाच्वंगु दु धयादिल ।

वय्कःपिं सकस्यां नं थज्याःगु कानुनी व्यवस्थां यानाः बलात्कारया नामय् मिसा सिबें नं मिजं अप्वः पीडित जुयाच्वंगु दु लाकि धकाः समेत बिचाः यायेमाःगु खँ नं तयादिल ।

सांसदतय्गु खँ न्यनेधुंकाः कानुन न्याय तथा संसदीय मामिला मन्त्री अजयकुमार चौरसियां जबर्जस्ती करणीया मुद्दायात नं वर्गीकरण यानाः स्वयेमाःगु बिचाः तयादिल । थुकिया लागिं विद्यमान ऐन परिमार्जन यानाः न्ह्याः वनेमाःगु खँ वःगु खःसा उकिया लागिं पहल यायेत नं सांसदतय्सं इनाप याःगु खः ।