लुम्बिनीया वज्रयान महाविहारय् दीपंकर बुद्ध थापना
येँ(नेपालभाषा टाइम्स)÷लुम्बिनीस्थित नेपाली मौलिक शैलीया नेपाल वज्रयान महाविहारय् दीपंकार तथागत बुद्धया मूर्ति थापना याःगु दु । शाक्यमुनि भगवान बुद्धया जन्मस्थल लुम्बिनीइ च्वंगु वज्रयान महाविहारय् थापना याःम्ह दीपंकर बुद्ध मूर्ति यलया नेमवीर शाक्यं दान यानादीगु खः
महाविहार संचालक समितिया पुलांम्ह सदस्य सचिव तकं जुयादीम्ह शाक्यं दान यानादीगु दीपंकरया मूर्ति थापना याये न्ह्यः बाजागाजासहितं लुम्बिनीस्थित मायादेवी देगःया परिक्रमा याःगु खः । वंगु माघ १७ गते मंगलवाः छगू विशेष ज्याझ्वःया दथुइ लुम्बिनी परिसरया परिक्रमा लिपा मूर्तियात महाविहारय् बिज्याकूगु खः । महाविहारया चक्रेश्वर प्रा. डा. नरेशमान वज्राचार्यया मूलाचार्यत्वय् वज्रयान परम्पराकथं विधिवत रुपं पुजा यानाः दीपंकर बुद्धया मूर्ति थापना याःगु खः ।
थ्व स्वयां न्ह्यः दाता शाक्यया हे छेँय् मूर्तिइ प्राण प्रतिष्ठा याःगु खः । वंगु माघ १३ व १४ गते निन्हुयंकं दाता शाक्यया यलय् च्वंगु छेँय् प्राण प्रतिष्ठा पुजा यानाःलि मूर्ति लुम्बिनीइ यंकूगु खः । दाता शाक्यया छेँय् महाविहारया चक्रेश्वर प्रा. डा. वज्राचार्य, राजगुरुजु मञ्जुश्रीरत्न वज्राचार्य, दशराज वज्राचार्यपिंसं वज्रयान परम्पराकथं पुजा यानादीगु खः । मूर्ति स्थापनाया इलय् महाविहारया थाय्पाजुपिंत दान प्रदान नं याःगु खः ।
LEAVE YOUR COMMENTS