ने. सं. ११४६ पाेहेलागा एकादशी - षट्रतिला एकादशि

न्हापांगु पलाःया भिंतुना कालबिल ज्याझ्वः

येँ(नेपालभाषा टाइम्स)-न्हापांगु पलाः नांया संस्थापाखें नेपाल संवत् ११४५ न्हूदँया लसताय् भिंतुना कालबिल ज्याझ्वः याःगु दु । संस्थापाखें क्वहिति बहालय् समाजया थीथी ख्यःया प्रतिष्ठित व्यक्तित्वपिनिगु उपस्थितिइ उगु ज्याझ्वः याःगु खः । ्

ज्याझ्वलय् मूपाहांकथं पूर्व संघीय मन्त्रीलिसें सांसद विराजभक्त श्रेष्ठ झायादीगु खः । ज्याझ्वलय् नवासें सांसद श्रेष्ठं स्वतन्त्र व निष्पक्ष धंगः जनताया सेवा याइपित राजनीतिक दलपाखें न्ह्यबलें नं प्रहार यायेगु ज्या जुयाच्वंगुलिं राज्यं अज्याःगु ज्या त्वःतेमाः धयादिल ।

सामाजिक अभियन्ता सुमन साय्मिं अधिकार प्राप्तिया आन्दोलनय् नेवाः न्ह्यमचिउगु धासें असन्तुष्टि व दुःख प्वंकादिल । लिसें वय्कलं नेवाःतय्के सांस्कृतिक रुपं गाक्कं चेतना ब्वलंसां राजनीतिक रुपय् धाःसा नेवाःतय्के अझं चेतनाया अभाव दुुगलिं हे लिउने लानाच्वंगु खः धयादिल ।

संस्थाया नायः शिला साय्मिं थःपिनिगु संस्थां थःगु हे छेँय् नं याकचाः च्वना च्वनेमाःपिं ज्याथःजिथिपिंत पित हयाः छगू थासय् मुंकाः जीवनोपयोगी प्रवचन बीगु नापं इमिगु सुख दुःखया खँ कनाः न्यंकाः इमित ग्वाहालि याना वयाच्वनागु जानकारी बियादि । अथे हे वय्कलं इमिसं थःगु जीवनय् उत्सव, लसता हने फइकथंया ज्याझ्वः यायेगु नापं आवश्यककथंया स्वास्थ्यलिसें मेमेगु सेवा बिया वयाच्वनागु खँ कनादिल ।

न्हापांगु पलाः मुक्कं मिसापिं जक जानाः चायेकातःगु संस्था खःसा थ्व संस्थापाखें विशेष यानाः ज्याथःजिथिपिनिगु सेवा लिसें इमिगु निंतिं आवश्यकताकथंया क्षेत्रय् ज्या याना वयाच्वंगु दु ।

थ्व हे झ्वलय् संस्थापाखें ज्याथःजिथिपिनिगु निंतिं सामुदायिक भवन निर्माणया निंतिं सछि तका दांया अभियान संचालन यानागु नं घोषणा याःगु दु ।