ट्रम्प व किम दथुइ जूगु खुल्ला वार्ता !

बहुप्रतिक्षित व बहुचर्चित अमेरिकी राष्ट्रपति डोनाल्ड ट्रम्प व उत्तर कोरियाली नेता किम जोंग उन दथुइ थौं सिंगापुरय् शिखर वार्ता जू वनाच्वंगु दु । विश्वया हे ध्यान सालानाच्वंगु व अतिकं अर्थपूर्ण रुपं स्वयाच्वंगु थौंया वार्ता स्वयाः न्ह्यः हे थुपिं निम्ह राजनेता दथुइ शिखर वार्ता जूगु दु ।

खतुं थौं जूवनाच्वंगु ट्रम्प व किमया शिखर वार्तायात ध्यानय् तयाः सुरक्षा व्यवस्था अतिकं कडा यानातःगु दुसा थुगु वार्ता स्वयां न्ह्यः निम्ह राजनेता दथुइ जूगु वार्ता औपचारिक धाःसा मखु, न त धाथें हे निम्ह राजनेता दथुइ जूगु खः । थौंया शिखर वार्ताया पूर्वसन्ध्याय् नक्कलि ट्रम्प व किम दथुइ शिखर वार्ता जूगु खः ।

विश्वं हे ध्यान बियाच्वंगु निम्ह राजनेताया दथुइ थौंया शिखर वार्ता अतिकं कडा सुरक्षा व्यवस्थाया दथुइ गोप्य रुपं जूवनाच्वंगु दुसा नक्कलि राजनेताया दथुइ जूगु शिखर वार्ताय् धाःसा सलंसः सिंगापुरवासीतय्सं मनोरञ्जन कायेत ताःलाःगु दु ।
सिंगापुरया मुख्य सहरया बुगिस जक्सन मलय् जूगु नक्कलि राजनेता वार्ताय् उत्तर कोरियाली नेता किमया हंगकंगया नांजाःम्ह कलाकार होवार्ड एक्स व ट्रम्पया भेषय् कलाकार डेनिस अलान आकाझाकां प्रस्तुत जूगु खः ।

मलय् निम्ह नक्कलि राजनेतां छम्हं मेम्हसित नाप लायेगु, ल्हाः मिले यायेगु, घय्पुइगु ज्या याःगु खः । तसकं व्यस्त मलय् निम्हेसिनं अन वयाच्वंपिंत ल्हाः संकाः अभिवादन नं याःगु खः ।उलिजक गन खः धकाः नक्कलि ट्रम्प व किमयात खनेवं अन वयाच्वंपिं गाहाकित इपिं नापं फोटो कायेत नं तसकं उत्सुक जूगु खः । इपिनापं ‘सेल्फी’ कायेत छगू एप्स डाउनलोड यायेमाःगु खःसा उकिया निंतिं १५ सिंगापुर डलर शुल्क पुलेमाःगु खः ।