ओलीयात गुटबन्दी याःगु द्वपं

येँ – नेकपा (एमाले) या वरिष्ठ नेतापिं झलनाथ खनाल व माधव नेपालं प्रधानमन्त्री एवं पार्टी अध्यक्ष केपी शर्मा ओलीं गुटगत भेला यानाः पार्टी एकताया आधार कमजोर याःगु द्वपं बियादीगु दु । म्हिगः निसें न्ह्याःगु राष्ट्रिय कार्यकर्ता भेलाय् वरिष्ठ नेता नेपालं अवधारणा पौ न्ह्यब्वसें फागुन २८ गते ओलीं गुटगत भेला यानाः पार्टी एकताया आधार कमजोर याःगु द्वपं बियादीगु खः ।

वय्कःया अवधारणा पतिइ ओली गुटं पार्टी एकता कमजोर याइगु जुयाः अज्याःगु कुतःयात असफल यायेमाःगु खँ न्ह्यथनातःगु दु । उकी धयातःगु दु, ‘२०७७ साल फागुन २८ गते गुट भेलाया निर्णयं पार्टी एकताया आधार कमजोर जूगु दु, अध्यक्षया गुटं पार्टी एकता कमजोर याइगु जूगुलिं उकियात असफल यायेत पार्टी पंक्ति छप्पँ जुइमाः; २०७५ जेठ २ य् कायम दुगु फुक्कं पार्टी कमिटी, निकाय, जनसंगठन व विभागतय् पुनस्र्थापना जुइमाः, पार्टीया गुक्वःगु महाधिवेशनया कार्यदिशा व विधानया आधारय् पार्टी सञ्चालन जुइमाः, गुक्वःगु महाधिवेशन लिपा ब्वलंगु फुक्कं कथंया विवादया विधिसम्मत समाधान मालेमाः ।’

भेलायात सम्बोधन यासें वय्कलं धयादिल, ‘नेकपाकालीन ‘साइबर स्याल’ अझं दनि खनी, जिमिसं ग्वसाः ग्वयागु भेला पनेगु निंतिं योगेश भट्टराईया नक्कली हस्ताक्षर छ्यलाः साइबर स्यालतय्सं फेक पौ जारी याःगु दु ।’ वय्कलं अज्याःपिं साइबर स्याल– पाखें होशियार जुइत इनाप यासें गलत सुचं अझ नं वये फइगु जुयाः कार्यकर्तापिंत अलमलय् मलायेत नं इनाप यानादीगु दु ।

उकथं हे मेम्ह नेता झलनाथ खनालं पार्टीयात गुटबन्दी यायेगु ज्या प्रम ओलीं शुरु याःगु द्वपं बियादीगु दु । नेता खनालं मदन भण्डारी फाउण्डेशन नीस्वनाः ओली गुटया राजनीति शुरु जूगु द्वपं नं बियादिल ।

वय्कलं प्रम ओलीं पार्टी दुने विधि, पद्धति हाचांगायाः पार्टीइ वैचारिक व सैद्धान्तिक वहसयात शून्य याःगु जक मखुसें पार्टीयात निरंकुश दयेकेगु, पार्टी पद्धतियात बेवास्ता यायेगु, विधि पद्धति हाचां गायेगु ज्या यानाच्वंगु दु धासें उकिया लिच्वः कथं सरकार गठन जूगु स्वदँ दयेधुंकाः नं देय् विकासया लँपुइ मन्ह्याःगु खँ धयादिल ।

नेता खनालं निर्वाचनय् थःपिंसं कृषि व भूमि क्रान्ति यायेमाः धकाः घोषणापत्रय् प्रतिबद्धता प्वंकागु खःसां बजेटय् उगु खँ दुमथ्याः धासें वर्तमान सरकार भ्रष्टाचारयात संस्थागत यायेगु ज्याय् न्ह्याःवनाच्वंगु द्वपं नं बियादिल ।

सम्बन्धित बुखँ

LEAVE YOUR COMMENTS