ने. सं. ११४४ कौलाथ्व पारू - नःलास्वनेगु

द्वाल्खा भाय्यात कयाः अन्तक्र्रिया

येँ(नेपालभाषा टाइम्स)- थःगु हे पहया बिस्कं म्हसीका दुगु द्वाल्खा भाय्या महत्व व थुकिया संरक्षणया विषययात कयाः छगू अन्तक्र्रिया ज्याझ्वः जुल । भीमेश्वर नगरपालिका दोलखा व बाँपिझ्याला मिडियाया मंकाः ग्वसालय् ‘द्वाल्खा नेपालभाषाया संरक्षण व थुकिया महत्व’ विषयय् उगु अन्तक्र्रिया ज्याझ्वः जूगु खः ।

अन्तरक्र्रियाय् मूपाहांकथं झायादीम्ह भीमेश्वर नगरपाकिाया प्रमुख ईश्वरनारायण मानन्धरं उलेज्या यानादीगु अन्तक्र्रियाय् द्वाल्खां थन वयाः च्वनाच्वंपिं द्वाल्खामि नेवाःतय् विशेष उपस्थिति दुगु खः । ज्याझ्वलय् भीमेश्वर नगरपालिका २ वडाअध्यक्ष स्टालिन श्रेष्ठ, वरिष्ठ इन्जिनियरलिसें समाजसेवी आत्माकृष्ण श्रेष्ठ, द्वाल्खापाखें प्रतिनिधित्व यानादीम्ह प्रतिनिधिसभाया पुलांम्ह सांसद दिव्यमणि राजभण्डारी विशेष पाहांकथं झायादीगु खः ।

मूपाहांया थासं भीमेश्वर नगरपालिकाया प्रमुख मानन्धरं मांभाय् व उकिया महत्वयात कयाः थःगु नुगःखँ तयादिसें थः मस्तय्त मांभाय् स्यनेगु इलय् अबु स्वयां नं मांया मुलय् च्वनाः याकनं सयेकीगुलिं थुखेपाखे ध्यान बीमाःगु आवश्यक जू धयादिल । लिसें वय्कलं द्वाल्खाया नेवाःतय्सं ल्हाइगु नेवाः भाय् मेमेगु थासय् च्वंपिंसं ल्हाइगु नेवाः भाय् स्वयां बिस्कं पहःया जूगु व थःगु हे मौलिकता नं दुगुलिं थ्व भाय्या संरक्षण यायेमाःगु अति आवश्यक जू धासें उकिया निंतिं नगरपालिकापाखें नुगः चकंकाः ग्वाहालि यायेगु प्रतिवद्धता नं प्वंकादिल ।

समकालीन एकता समाजया नायः सकुना श्रेष्ठ मलेकुं लसकुस यानादीगु ज्याझ्वलय् द्वाल्खा नेपालभाषा खलकया अध्यक्ष नहेन्द्र प्रधानं द्वाल्खा नेपालभाषा नवाइगु प्रारम्भिक थाय्, भौगोलिक विविधता व क्षेत्रया परिचर्चा यानादीगु खः ।

पुलांम्ह महान्यायाधिवक्तालिसें वरिष्ठ अधिवक्ता मुक्ति प्रधानं द्वाल्खा भाय्या उद्गम विन्दु व द्वाल्खा भाय्या धार्मिक कथन, ऐतिहासिक सहिष्णुता व द्वाल्खा भाय्या संरक्षणया निंतिं यायेमाःगु ज्याझ्वः व क्रियाकलाप बारे नुगःखँ तयादीगु खः ।

प्राध्यापक अमन श्रेष्ठं द्वाल्खा नेवाः भाय्या मौलिकतायात ल्यंका तयेगु खःसा मेमेगु भाय् ल्वाकछ्यानाः संबोधन यायेगु, अभिवादन यायेगु व परिभाषा बीगु ज्या याये मजिउगु व थुकियात तत्काल दिकेगुपाखें सचेत जुइमाः धयादिल ।

ज्याझ्वलय् सुभाय् देछायेगु झ्वलय् द्वाल्खा भासं हे थःगु नुगःखँ तयादिसें पुलांम्ह सांसद राजभण्डारीं द्वाल्खा भाय्या संरक्षण व संवद्र्धनया निंतिं बाँपिझ्याला मिडियां यानाच्वंगु कुतःयात च्वछायादीगु खः । लिसें वय्कलं द्वाल्खा नेपालभाषाया निरन्तरताया निंतिं नियमित रुपं अभ्यास याना वना च्वनेमाःगु अनिवार्य जूगु खँय् नं बः बियादीगु दु ।

सभापतिया थासं बाँपिझ्याला मिडियाया अध्यक्षनापं बाँपिझ्याला डटकमया सम्पादक उपेन्द्र प्रधानं ज्याझ्वःया उद्देश्ययात कयाः नुगःखँ तयादीगु ज्याझ्वलय् द्वाल्खा नेपालभाषा, गुकिया विकासक्रम व महत्वयात कयाः ज्यापौ नं न्ह्यब्वयादीगु खः ।

अन्तक्र्रियाय् देय् दबूया केन्द्रीय न्वकु शान्त श्रेष्ठ, देय् दबू द्वाल्खा जिल्लाया नायः देवेन्द्रनारायण प्रधान, कालिञ्चोक युवा क्लबया अध्यक्ष निरेन्द्र मास्केलिसें द्वाल्खाया नेवाः भाय् सरह एकरुपता वइकथं नवाइगु सिन्धुपाल्चोक तौथलीपाखें अमृतबहादुर श्रेष्ठ, रामकुमार श्रेष्ठ, भेषकुमार श्रेष्ठ, सिन्धुपाल्चोकया हे लिस्तिपाखें चमेली प्रधान, शंकर प्रधान लगायतया उपस्थिति दुगु खः ।