छक्वलं स्वपु म्येँया म्युजिक भिडियो

यल- ऐतिहासिक व सांस्कृतिक नगरी हरिसिद्धि जलय् जूगु छगू ज्याझ्वलय् छक्वलं स्वंगू नेपालभाषा म्युजिक भिडियो सार्वजनिक याःगु दु । वंगु शनिवाः जूगु ज्याझ्वलय् ‘सिलाचः¥हे, पाहांचः¥हे’, ‘स्वांया वासना’ व ‘छंगु रुप खनाः’ म्येँया म्युजिक भिडियो पितब्वज्या याःगु खः ।
जल देय्या नांजाःम्ह तबला गुरु निरञ्जन महर्जनया सभापतित्वय् जूगु ज्याझ्वलय् नेपालभाषाया न्हापांम्ह म्युजिक भिडियो निर्देशक विजयरत्न असंबरे मूपाहांकथं झायादीगु खः ।

विशेष पाहांकथं समता संगीत साधना केन्द्रया तुलसी महर्जन, हरिसिद्धि भजन मण्डलया सचिदानन्द महर्जन, समाजसेवी महेन्द्र श्रेष्ठ, मंगल महर्जन, नांजाःम्ह संगीतकार जीवित जल्मी झायादीगु ज्याझ्वलय् मूपाहां असंबरे, पितब्वज्या जूगु स्वंपुं म्येँया म्येँ हालामिपिं अशोक महर्जन व राजेन्द्र महर्जनं थःथःगु नुगःखँ तयादीगु खः ।

पितब्वज्या जूगु म्युजिक भिडियोमध्ये ‘सिलाचः¥हे, पाहांचः¥हे’ म्येँ महर्जनद्वयं हालादीगु खःसा नांजाःम्ह म्येँ हालामि विष्णु जल्मीं च्वयादीगु खः । थुगु म्येँया संगीत संयोजन निरञ्जन महर्जन कुमारीं यानादीगु खःसा म्युजिक भिडियोया छाँयाकनं रविन डंगोल व निर्देशन व सम्पादन बीके जल्मीं यानादीगु खः । म्युजिक भिडियोय् विश्वनाथ महर्जन, विक्रम महर्जनं म्हितादीगु खः।

अथे हे अशोक महर्जनं हालादीगु ‘स्वांया वासना’ म्येँ कृष्णराम महर्जनं च्वयादीगु खःसा संगीत निरञ्जन महर्जन कुमारीया खः । थुगु म्येँया म्युजिक भिडियोया छाँयाकन व सम्पादन बीके जल्मी, निर्देशन व कोरियोग्राफी सुरज नापितं यानादीगु खःसा किशोर चिपालु व रोजिना सुवालया अभिनय दुथ्यानाच्वंगु दु ।

थुकथ हे ‘छंगु रुप खनाः’ म्येँ निरञ्जन महर्जन कुमारी च्वयादीगु व लसय् हनादीगु खःसा राजेन्द्र महर्जन व दिपा महर्जनं हालादीगु खः । सोहन मानन्धरं छाँयाकन यानादीगु म्येँय् आराध्यलक्ष्मी खड्गीं कोरियोग्राफी यानादीगु खःसा थुगु म्येँया म्युजिक भिडियोय् राजु महर्जन, आराध्यलक्ष्मी खड्गी, पूर्णकाजी ज्यापु लगायतया कलाकारं म्हितादीगु दु ।

सम्बन्धित बुखँ

LEAVE YOUR COMMENTS