युवा बौद्ध पुचलं धर्मरत्न लुमंकल

ख्वप (नेपालभाषा टाइम्स) – युवा बौद्ध पुचःया संस्थापकलिसें वर्तमान नायः बौद्ध च्वमि धर्मरत्न शाक्य (डीआर शाक्य ‘ऋषि’)या लुमन्तिइ बौद्ध समकृत विहार कुथुबहिलिइ विचाः मुँज्या जुल ।

पुचःया न्वकु रत्नसुन्दर शाक्यया सभापतित्वय् बौद्ध विद्वानलिसें सहभागि सकसिनं मदुम्ह शाक्यया किपाय् स्वां देछासे मुँज्या न्ह्याःगु खः । मुँज्याय् नवासें मैत्रेय युवा संघया नायः तीर्थराज वज्राचार्यं मदुम्ह शाक्यं च्वयादीगु बौद्धकालीन संकिपा घोषक तयार जुइधुंकूगु खःसां वय्कलं दकलय् न्हापां च्वयादीगु ‘पाखाजा’ नांया संकिपा तयार यायेमाःगु व थ्व सम्बन्धय् ख्वपय् तसकं सहलह जुयाच्वंगु खँ कनादिल ।

भक्तपुर सुनचाँदी व्यवसायी संघया नायः लिसें मदुम्ह शाक्यया किजा प्रदीपरत्न शाक्यं थः छेँजःपिंसं ध्यबा कमे यायेगु स्वयां नं समाजया निंतिं छुं यायेगु व नां तयेगु ज्या यानाच्वंगु दु धयादिल । ज्याझ्वःया सभापति शाक्यं मदुम्हेसिया संक्षिप्त म्हसीका न्ह्यब्वयादीगु मुँज्याय् पुचःया आजीवन दुजः विजेन शाक्यं मदुम्हेसिया लुमन्तिइ कविता वाचन यानादीगु खःसा प्रताप मानन्धरं शोकपत्र ब्वनाः न्यंकादीगु खः । मदुम्ह शाक्यया काय सुजन शाक्यं थः अबुयात जूगु ल्वय्या बारे कनादीगु खःसा थीथी व्यक्तित्वपिंसं नं वय्कःया बारे नुगःखँ प्वंकादीगु खः ।

मदुम्ह शाक्यं ‘सन्ध्या टाइम्स’ न्हिपतिइ बौद्ध च्वसु च्वयाः निक्वःतक पंचवीर सिंह सिरपाः निक्वः त्याकादीधुंकूगु दु ।

सम्बन्धित बुखँ

LEAVE YOUR COMMENTS