वुहानय् च्वंपिं नेपाःमितय् सुरक्षाय् चीनया ग्यारेन्टी

येँ -चीन सरकारं कोरोना भाइरस न्यनाच्वंगु वुहान शहरय् च्वनाच्वंपिं नेपाःमित सुरक्षित दुगु व उमिगु जीवन रक्षा व स्वास्थ्य उपचारया ग्यारेन्टी दुगु खँ धाःगु दु । चिनिया विदेश मन्त्रालयं शनिवाः छगू विज्ञप्ति जारी यासें नेपाःमितय् स्वास्थ्ययात कयाः चिन्ता मकायेत इनाप याःगु खः । विज्ञप्तिइ छुं विद्यार्थी सहित नेपाःमित अझं वुहानय् दु धासें उमिगु जीवन व स्वास्थ्य उपचारय् ग्यारेन्टी दुगु खँ धयातःगु दु ।

वुहानय् च्वनाच्वंपिं नेपाःमित नयेगु तकं मदयाः समस्याय् लानाच्वंगु व उमिगु याकनं उद्धार यायेमाःगु खँ पिहां वयाच्वंगु इलय् मन्त्रालयं थ्व विज्ञप्ति पिकयाः नेपाःमितय् सुरक्षाया ग्यारेन्टी बिउगु खः ।

नेपाःस्थित चिनिया राजदूतावासं उपलब्ध याकूगु विज्ञप्तिइ विदेशी नागरिकत स्वास्थ्य सुनिश्चित यायेगु निंतिं फुक्क कथंया कुतः यायेगु व सकसिगुं जायज चिन्ता मदयेकेगु निंतिं ज्या यायेगु खँ धयातःगु दु । लिसें विज्ञप्तिइ आः न्यनाच्वंगु महामारी नियन्त्रणया ज्याय् चीन सक्षम दुगु व चीनं अन्तर्राष्ट्रिय दायित्व पालना यायेत जिम्मेवारीपूर्वक ज्या याइगु खँ नं धयातःगु दु ।

अथेहे चीन सरकारं वुहानय् च्वनाच्वंपिं नेपाःमितय्त छुं कथंया ग्वाहालि आवश्यक जूसा चिनियाँ दूतावास वा चीनया विदेश मन्त्रालयय् स्वापू तये फइगु खँ नं धाःगु दु । मेखे विश्व स्वास्थ्य संगठन (डब्ल्यूएचओं) धाःसा चीनं न्यनावंगु कोरोना भाइरसयात कयाः आपतकालिन स्थिति घोषणा याःगु दु । डब्ल्यूएचओया महानिर्देशन टेड्रोस एडेहेनोम ग्रब्रीयेसोसं जेनेभाय् छगू पत्रकार सम्मेलन यासें थ्व भाइरस नियन्त्रणया निंतिं चीनं यानाच्वंगु कुतःया तारिफ यासें थ्व भाइरस मेमेगु देशय् नं न्यना वनाच्वंगु खँय् चिन्ता प्वंकूगु खः ।

वय्कलं संकटकालया घोषणा चीनयात स्वयाः जक याःगु मखुसे विश्वय् न्यना वनाच्वंगु कारणं यानागु खँ धयादीगु दु । थ्व भाइरस नेपाःलिसें थीथी झिंखुगू देशय् खने दयेधुंकूगु दु ।थ्वहे झ्वलय् चीनय् च्वनाच्वंपिं नेपाःमितय् उद्धार यायेगु लागिं ब्वया वनेगु लागिं सरकारं नेपाल वायुसेवा निगमया चार्टर विमान तयार याःगु खँ सीदुगु दु । आवश्यक जुइवं थ्व विमान चीनपाखे वनी ।