निभालं बचे यायेत !

थौंकन्हय् मौसमय् आपालं हिउपाः वयाच्वंगु दु । ताल्लाया ई जूसां नं वा छक्वः वल धाःसा चिकुलाया ई थें हे च्वंक मौसम ख्वाउँसे च्वं । अले वा मवल धाःसा तच्वकं हे तांन्वः । मौसमनापनापं तांन्वःगु नं उतिकं अप्वयाच्वंगु दु । थ्व ताल्लापाखें बचे जुइत मनूतय्सं ला अनेक उपाय नालाच्वंगु दु ।

इमिसं थः जक मखु, थःगु छेँय् लहिनातःपिं जनावर व झंगःपछियात नं उकथं हे सुसाःकुसाः यानाच्वंगु दु । तर भारतया छम्ह मनुखं धाःसा सजीव प्राणीया निंतिं मखु निर्जीव वस्तुयात नं निभालं बचे यायेगु निंतिं छगू अजू चायापुगु उपाय नालाकाःगु दु । भारतया अहमदावादया छम्ह मिसां थःगु लखौं तका तूगु कारयात निभाः व ताल्लां बचे यायेत कार छगलं गोबरं इला बिउगु दु ।

सेजल नांया मिसां थथे गोबर इलाबिल धाःसा कार ख्वाउँसे च्वना च्वनी धकाः थःगु कार छगलं गोबरं इला बिउगु खः । कार छगलं गोबरं इला तःगु फोटो रुपेस गौरंग दास नांया मनुखं सामाजिक संजालय् तया बीवं उगु किपा आः भाइरल नं जुयाच्वंगु दु । गौरवं च्वःगु दु, ‘जिं आतक साया गोबरयात थुलि बांलाक उपयोग यानातःगु न्हापांखुसी खना, थ्व अहमदावादया खः ।’

ऋहमदावादया झण्डै ४५ डिग्रीया तापक्रम दुसा अनच्वंपिं मनूत थःपिं सुरक्षित जुइगु निंतिं अनेक उपाय ला यानाच्वंगु हे जुल । लिसें कारयात नं ख्वाउँका तयेगु निंतिं सेजलं थुकथं थःगु कार छगलं गोबर इला बिउगु खः ।