विप्लव प्रति सरकार अझ कठोर

विप्लव पुचलं आपराधिक याना जूगु मन्त्रीया द्वपं

येँ – प्रतिबन्धित नेत्रविक्रम चन्द ‘विप्लव’या नेपाल कम्युनिष्ट पार्टी प्रति सरकार अझ हे कठोर जुइगु संकेत खने दयावःगु दु । म्हिगः सञ्चार मन्त्रालयं याःगु पत्रकार सम्मेलनय् सरकारया प्रवक्ता गोकुल बास्कोटां विप्लव पुचः राजनीतिक संगठन मजुसे आतंककारी संगठन खः धासें थ्व प्रति सरकार अझ कठोर जुयाः प्रस्तुत जुइगु संकेत बियादीगु खः ।

विप्लव पुचः माक्र्सवाद जक मखु गुगुं नं वाद, विचार व दर्शनपाखें सञ्चालन जुयाच्वंगु मखु धासें वय्कलं समाज, राज्य व्यवस्था मदुगु थासय् म्हिताः अराजकता न्यंकेगु व ध्यबा कमे याइगु पुचः जक खः धकाः द्वपं बियादिल । वय्कलं धयादिल, ‘थ्व मिहेनत यानाः मखुसें लुटे यानाः नइगु पुचः जक खः ।’

विप्लव पुचः संगठित अपराधपाखे न्ह्याः वनाच्वंगु सामाजिक फासीवादी पुचः जूगुलिं सरकारं वार्ताया कुतः यात नं वार्ताय् मवःगु द्वपं नं वय्कलं बियादिल । सञ्चारमन्त्री बास्कोटां धयादी, ‘सरकारं वार्ता नं यात । विप्लवं वार्ता चाहे मजू, मखुगु ज्या यानाच्वन, गैरसंवैधानिक ज्या यानाच्वन ।

अथे जूगुलिं उमित नियन्त्रणय् कायेगु व निस्तेज यायेगु ज्या सरकारया खः ।’नेपालय् गुलि हिउपाः हयेमाःगु खः व जनतां हयेधुंकूगु दावी यासें मन्त्री बास्कोटां आः स्कुल बन्द यानाः, हत्या हिंसाया लँपु ल्ययाः सुयागु सेवा यायेत्यंगु खः धकाः न्ह्यसः नं तयादिल ।