छमा सिमा पाःसा मेगु २५ मा पीमाः

येँ – निज गढय् दयेकेत्यंगु निगूगु अन्तर्राष्ट्रिय विमानस्थल निर्माण याइबलय् गुलि नं सिमा पाली उकी छमा सिमा बराबर मेगु २५ मा सिमा पीमाःगु शर्त वन मन्त्रालयं न्ह्यःने तःगु दु ।

थ्व शर्त न्ह्यःने तसें विमानस्थल दयेकेगु लागिं पर्यावरणीय रिपोर्ट (ईआईए) यात नं मन्त्रालयं स्वीकृत याःगु दु । वन मन्त्रालयपाखें विमानस्थलया पर्यावरणीय रिपोर्ट स्वीकृत यायेवं आ ज्या ह्याकेगु चहलपहल नं सुरु जूगु खँ धाःगु दु ।
थ्व विमानस्थल दयेकेगु लागिं निजगढया ११ हजार ७७५ विगाहा जग्गा अतिक्रमण यानाः कायेमाःगु अवस्था दु । थ्व अतिक्रमण यायेमाःगु जग्गा मध्ये १० हजार ९१५ विगाह जग्गा पूरा घना जंगल खः । थ्व जंगल दुने ग्वःमा सिमा पालेमाः धइगु ल्याःचाः सी मदुनि । वन मन्त्रालयं छमा सिमा बराबर २५ मा सिमा पीमाः धइगु शर्त न्ह्यःने तःगु दु । थ्व लगायत मेगु १५ गू शर्त मन्त्रालयं न्ह्यःने तःगु खः ।

विमानस्थलया लागिं अतिक्रमण यानाः काइगु जग्गा दुने हे निगू मानव वस्ती नं लानाच्वंगु दु । उकी छगू वस्ती लालपूर्जा हे दुपिं मनूतय्गु वस्ती खः । सरकारं उमित मुआब्जा नं बीगु सुरु यायेधुंकल । मेगु वस्ती धाःसा जंगल हे अतिक्रमण यानाः च्वनाच्वंपिं सुकुम्बासीतय्गु वस्ती खः । द्वलंद्वः मनूत च्वनाच्वंगु थ्व वस्तीयात छु यायेगु धकाः आः तक सरकारं निर्णय याये मफुनि ।

विमानस्थल दयेकेगु जिम्मा सरकारं दक्षिण कोरियाया ल्याण्डमार्क कम्पनीयात बिउगु खः । थ्व कम्पनी वि.सं २०७० तकया दुने ज्या सुरु यायेगु धकाः ठेक्का लाकूगु खःसां थीथी कारणं यानाः आः तक निर्माणया ज्या हे न्ह्याके फुगु मदुनि । ईआईए रिपोर्टया स्वीकृति नं छगू महत्वपूर्ण त्वाथः पार जूगु खः धाःगु दु ।