प्यथाय् पानीजहाज चले यायेत अध्ययन

येँ – नेपालय् नं पानी जहाज चले यायेवगु बारे नेपाः व भारतं मंकाः अध्ययन याइगु जूगु दु । थीथी प्यंगू जलमार्गय् पानीजहाज चले यायेगु बारे निगू देय्या उच्च अधिकारीया बैठकं प्राविधिक अध्ययन यायेगु निर्णय याःगु खः । पानीजहाज चले जुइगु मार्गय् साहेबगञ्ज–मरीहरी–पानी ट्याङकी व काँकडभिट्टा, हल्दिया–वाराणसी, सुनौली व भैरहव, कालुघाट–वाल्मिकीनगर व गण्डक ब्यारेज अले साहेबगञ्ज भीमनगर कोशी ब्यारेजया नां दुथ्याः ।

बैठकय् निगू देय्या मंकाः प्राविधिक पुचः दयेकाः नारायणी खुसिइ जल यातायात सञ्चालन सम्बन्धी प्राविधिक अध्ययन तत्काल न्ह्याकेत सहमति जूगु दु । भारतीय अधिकारीतय्सं गण्डक खुसि जुयाः नेपालं पानीजहाजपाखें सामान आयात निर्यात याये फइगु खँ धायेगु यानाच्वंगु दु ।

बैठकय् नेपाली पक्षं जल तथा ऊर्जा आयोगया सहसचिव लिसें पुचःया प्रमुख माधव बेल्बासेया नेतृत्वय् झिम्ह उच्च सरकारी अधिकारीतय्सं ब्वति काःगु खः । अथेहे भारतीय सरकारपाखें अन्तरदेशीय जल यातायात प्राधिकरणया उपाध्यक्ष प्रविर पाण्डेया नेतृत्वय् च्याम्हेस्यां ब्वति काःगु खः ।

 

सम्बन्धित बुखँ

LEAVE YOUR COMMENTS