लुँआखःया सफू पाठ यायेगु शुरु

यल (नेपालभाषा टाइम्स)- यलया नांजाःगु हिरण्यवर्ण महाविहारय् च्वंगु अष्टसहस्रिका प्रज्ञापारमिता सफू म्हिगःनिसें हानं पाठ यायेगु शुरु जूगु दु । पुरुषोत्तम महिना लछि थ्व सफूया स्यंल्ह्वं यायेमाःगु जुयाः थुकिया पाठ यायेगु ज्या दिकातःगु खः । म्हिगःनिसें स्यंल्ह्वं यायेगु ज्या क्वचाःगुलिं म्हिगः हे सफुतिइ प्राण प्रतिष्ठा याःगु खः । लिसें म्हिगः गुथिया नामं पाठ यायेगु ज्या जूगु खः ।

महाविहारया दुजः हेमरत्न वज्राचार्यं कनादीकथं थुगुसी अनला क्वचाये स्वयां न्यान्हु न्ह्यः हे सफूया स्यंल्ह्वं यायेज्या क्वचाःगुलिं म्हिगःनिसें पाठ यायेगु शुरु जूगु खः । थनिंनिसें सर्वसाधारणया नामं नं पाठ यायेगु शुरु जुइ । स्वसः पेज दुगु थुगु सफुतिइ च्याद्वःगू श्लोक च्वयातःगु दु । थ्व श्लोक फुक्कं लुँआखलं च्वयातःगु खः । सफूया श्लोकत भाय् संस्कृति व रञ्जना लिपिं च्वयातःगु खः ।

किपा ः क्षितिज सुदर्शन