
येँ (नेपालभाषा टाइम्स)- प्रधानमन्त्री पुष्पकमल दाहालं नेपाःया संघीयतायात खःगु कथं न्ह्यःने न्ह्याकेत थम्हं विशेष जिम्मेवारी पूवंकेगु खँ धयादीगु दु । म्हिगः नेपाल तामाङ घेदुङं येँय् ग्वसाः ग्वःगु ल्होसार पर्व सम्बन्धी ज्याझ्वःयात सम्बोधन यासें वय्कलं उगु खँ धयादीगु खः ।
सम्बोधनया झ्वलय् अध्यक्ष दाहालं नेपाःया संविधानय् न्ह्यथनातःगु समावेशी व समानुपातिक प्रावधानया लिसें संघीयतायात खःगु कथं न्ह्यःने न्ह्याकेत थम्हं विशेष भूमिका म्हितेगु खँ धयादीगु खः ।
वय्कलं विदेशी संस्कृतिया प्रभुत्व, हस्तक्षेप, प्रभावपाखें नेपाःया राष्ट्रिय संस्कृति ल्यंके मबीगु कुतः जुयाच्वंगु धासें सामन्ती एकात्मकताया हस्तक्षेप विरुद्धया लडाईं अझ नं न्ह्यानाच्वंगु इलय् वैदेशिक सांस्कृतिक हस्तक्षेप जूगुलिं नेपाःया राष्ट्रिय संस्कृति ल्यंकेगु दायित्व फुकसिया जूगु खँ नं धयादिल ।
उकथं हे वय्कलं वर्तमान सरकारय् तामाङ समुदायया प्रतिनिधित्व याइम्हेसित मन्त्री दयेकेगु प्रतिवद्धता नं प्वंकादीगु दु । लिसें वय्कलं ल्होसार पर्व तामाङतय्गु जक पर्व मखु धासें थ्व पर्व राष्ट्रिय अन्तर्राष्ट्रिय पर्व जूगु खँ धयादिल ।
LEAVE YOUR COMMENTS