मेयर साहया अन्यायविरुद्ध १५ गते वृहत प्रदर्शन

येँ (नेपालभाषा टाइम्स)- येँया मेयर बालेन साहपाखे पीडित जूगु धासें थ्वहे वइगु माघ १५ गते येँय् बृहत प्रदर्शन याइगु जूगु दु । वइगु १५ गते माइतीघर मण्डलाय् प्रदर्शन यायेत्यंगु खः । सतक विस्तार यायेगु नामय् येँया स्थानीय जनताया निजी जग्गाय् तकं डोजर चले यानाः आतंक ब्वलंकेगु ज्या याःगुलिं उकिया विरोधय् प्रदर्शन यायेत्यंगु खः ।

उपत्यकाव्यापी सतक विस्तार पीडित संघर्ष समितिया संयोजनय् बृहत प्रदर्शन यायेत्यंगु खः । विरोध प्रदर्शन ज्याझ्वलय् स्वनिगःन्यंकंया सतक विस्तार पीडित लिसें मेयर साहया थीथी ज्याया कारणं मारय् लाःपिं पीडितपिसं ब्वति काइगु खँ धाःगु दु । संघर्ष समितिया संयोजक सुमन साय्सिया कथं माघ १५ गते न्हिनय् २ बजे माइतीघर मण्डलाय् शान्तिपूर्ण प्रदर्शन यायेत्यंगु खः ।

वंगु बिहीवाः येँ मनपायाया वडा नं. ३१ स्थित शंखमुलय् अनावश्यक रुपय् लँ तब्याः यायेगु नामय् स्थानीय साहेल महर्जन (अवाले) या निजी जग्गाय् गुगुं नं कथंया सुचं मबिसे डोजर चले यायेत स्वयेवं स्थानीय जनता आक्रोशित जूगु खः ।

येँ मनपाया मेयर साहया आदेशय् टुकुचा खुसी मालेगु नामय् जय नेपाल हल लिउनेया स्थानीय जनताया छेँया कम्पाउण्ड थुनेगु, येँया थाय्मदुइ च्वंगु सामुदायिक भवन (त्वाःछेँ) छम्ह मनूया उजुरीया आधारय् डोजर हयाः थुनाबिउगु खः । थ्व निगुलिं ज्या गैरकानुनी जूगु धासें सर्वोच्च अदालतं अन्तरिम आदेश जारी याःगु खः ।

मेयर साहं थापाथलीइ च्वंगु सुकुम्बासी चीकेगु कुतः याःगु झ्वलय् स्थानीय वासिन्दां नगर प्रहरीया प्रतिकार याःगु खःसा उकी लानाः मनपाया आपालं प्रहरी घाःपाः जूगु खःसा मनपाया उगु ज्या पाय्छि मजू धासें भूमि आयोगं तत्काल बस्ती चीकेगु ज्या दिकी धकाः येँमपनायात निर्देशन बिउगु खः ।

उकथं हे मोहनी नखःया इलय् येँया थीथी थासय् च्वंगु अन्डरग्राउन्डय् चायेकातःगु पसः जबरजस्ती बन्द याकूगु खः । साहया थुकथं थीथी कथंया अत्याचार विरुद्ध पीडितपिसं प्रदर्शन यायेत्यंगु खःसा संघर्ष समितिं उगु न्हिं ब्वति कायेगु नितिं इनाप याःगु दु ।

सम्बन्धित बुखँ

LEAVE YOUR COMMENTS