यँयाःया लसताय् म्येँ व हुलाप्याखं कासा जुइगु
यल- यल महानगरपालिका वडा नं. १६या ग्वसालय् यँयाः नखःया लसताय् वडाव्यापी म्येँ व हुलाप्याखं कासा याइगु जूगु दु । यँयाःया झ्वलय् लाकाः जूगु छगू ज्याझ्वलय् उकिया घोषणा याःगु खः।
यल मनपा १६ वडा कलाकार समितिया ग्वसालय् जुइगु कासाय् ब्वति काये मं दुपिं कलाकारतय्सं थम्हं हालातःगु म्येँ व हुलाप्याखंया भिडियो तयार यानाः समितिया इमेलय् वा वडा ज्याकुथिइ दर्ता याये फइगु व्यवस्था याःगु दु ।
ग्वसाः खलकथं बिउगु जानकारीकथं निगुलिं विधाया कासाय् न्हापयात नीन्याद्वः, लिउयात झिंन्याद्व, लियांलिउयात झिद्वः तका नगदलिसें मेमेगु नं सिरपाः बीगु जूगु दु । अथे हे टप भ्युजयात नं सिरपाःया व्यवस्था यानातःगु दु । कासाय् टप टेन दुने लायेत ताःलाःपिंत बिस्कं प्याकेज प्रशिक्षणया नं व्यवस्था दुगु व कासाया समापन नापं सिरपाः बीगु ज्याझ्वः वइगु ने.सं. ११४२ न्हूदँया लसताय् जुइगु सांस्कृतिक ज्याझ्वलय् लःल्हाइगु जुयाच्वंगु
दु ।
कासाया घोषणा यायेगु ल्याखं जूगु ज्याझ्वलय् भूपेन्द्र वज्राचार्य, नील शाक्य, सुरजवीर वज्राचार्य, सुलिन्द्र शाक्य, निर्मलरत्न शाक्य, अमर चित्रकार, अमोघवीर वज्राचार्य, भूषण वज्राचर्या, रेजिना वज्राचार्य, नदिम शाक्यलिसें रेण्डर ब्यान्डं थःगु सांगीतिक प्रस्तुति बिउगु खःसा निसिला शाक्य, दिया शाक्य, सोनिया, संयुक्ता शर्मा, निभाः वज्राचार्य, हितेषा शाक्य, साइरा महर्जन लगायतया कलाकारं हुलाप्याखं न्ह्यब्वयादीगु खः ।
समापन ज्याझ्वलय् अग्रज कलाकारया सम्मान व वडाया लोकंह्वाःपिं कलाकारया नं प्रस्तुति दइगु समितिं जानकारी बिउगु दु ।
उगु हे ज्याझ्वलय् १६ वडापाखें नागबहालय् पुनःनिर्माण याःगु गगन बाटिकाया नं उलेज्या याःगु खः । मूपाहांकथं झायादीम्ह यल महानगरपालिकाया प्रमुख चिरिबाबु महर्जनं बाटिकाया उलेज्या यानादीगु खः । ज्याझ्वलय् नवासें मूपाहां यल महानगर प्रमुख महर्जनं स्मार्ट सिटी निर्माण अभियानय् पुनःनिर्मित बाटिका च्वछायेबहजू धयादिल ।
यल मनपा १६ वडाअध्यक्ष निर्मलरत्न शाक्यं लसकुस यानादिसें बाटिकाया पुनःनिर्माणं थः तसकं उत्साहित जूगु धासें वडा दुनेया सांस्कृतिक महत्वया न्याखाचुक व इलाननिया नं याकनं पुनःनिर्माण यायेगु योजना दुगु जानकारी बियादिल । पुनःनिर्माण समितिया संयोजकलिसें नागबहाल टोल सुधार समितिया अध्यक्ष रविन्द्र शाक्यं पुनःनिर्माणया ज्याय् योगदान बियादीपिनिगु बारे जानकारी बियादीगु खःसा कलाकार समितिया संयोजक सुरजवीर वज्राचार्यं समितिपाखें ग्वसाः ग्वयेत्यंगु ज्याझ्वःया बारे जानकारी बियादीगु खः ।
LEAVE YOUR COMMENTS