एमालेया देवराज घिमिरे न्हूम्ह सभामुख
येँ (नेपालभाषा टाइम्स)÷सत्ता गठबन्धनपाखें एमालेया सांसद देवराज घिमिरे सभामुखय् निर्वाचित जूगु दु । प्रतिनिधिसभाय् म्हिगः जूगु निर्वाचनय् नेपाली कांग्रेसया ईश्वरीदेवी न्यौपानेयात बुकाः वय्कः सभामुख जुयादीगु खः ।
घिमिरेया प्रस्तावकय् सुवास नेम्वाङ, समर्थकय् हितराज पाण्डे, राजेन्द्र लिङ्देन व रवि लामिछाने च्वंगु खःसा न्यौपानेया प्रस्तावक विश्वप्रकाश शर्मा व समर्थक प्रकाश ज्वाला च्वनादीगु खः ।
चुनावय् घिमिरेया पक्षय् १६७ मत लाःगु खः । २७५ म्ह दुजः दुगु प्रतिनिधिसभाय् म्हिगः २६८ म्ह सांसदं ब्वति काःगु खः । घिमिरेया विपक्षय् १०० मत लाःगु दु । न्हापांगु प्रस्तावय् हे घिमिरेया पक्षय् सभामुख निर्वाचित जुइत माःगु न्यूनतम १३८ मत वःगुलिं वय्कःयात निर्वाचित घोषणा याःगु खः ।
सभामुख निर्वाचनया नितिं एमालेया घिमिरे व कांग्रेसया न्यौपानें उम्मेदवारी बिउगु खःसां घिमिरेया पक्षय् बहुमत वयेवं न्यौपानेयात सभामुख दयेके धइगु प्रस्तावय् मतविभाजन मयाःगु खः । म्हिगःया मतदानय् मतदानय् नेमकिपाया प्रेम सुवालं घिमिरेया पक्ष वा विपक्षय् मत मबिसें तटस्थ च्वंगु खः । थ्वहे झ्वलय् न्हू निर्वाचित जुयादीम्ह सभामुख घिमिरें थःगु कार्यकालय् बोली व व्यवहार निगुलिं निष्पक्ष व तटस्थ भूमिका म्हितेगु खँ धयादीगु दु ।
थःगु प्रतिक्रिया बीगु झ्वलय् न्हू निर्वाचित जूम्ह सभामुख घिमिरें धयादिल, ‘सभामुख ल्ययेगु झ्वलय् प्र्रजातन्त्रया सुन्दर अभ्यास जूगु दु, उगु अभ्यासं जि निर्वाचित जूगु दु, सभामुखया बांलाक भूमिका म्हितेगु जुइ, वहे कथं योजना दयेकाः ज्या यायेगु जुइ ।’ उकथं हे वय्कलं न्हापायापिं सभामुखपिंसं याःगु कमजोरीपाखें शिक्षा कयाः न्ह्याः वनेगु खँ धासें दलतलिसे सहलह, समन्वय यानाः न्ह्याः वनेगु खँ
धयादीगु दु । उकथं हे वय्कलं प्रतिनिधिसभाय् यायेगु झ्वलय् सुयातं नं दलीय आधारय् भेदभाव मयायेगु खँ धयादीगु दु ।
LEAVE YOUR COMMENTS