नागरिकता विधेयक विरुद्ध रिट

येँ (नेपालभाषा टाइम्स)- राष्ट्रपति रामचन्द्र पौडेलं नागरिकता विधेयक प्रमाणीकरण याःगु विरुद्ध सर्वोच्च अदालतय् रिट लाःगु दु । राष्ट्रपति पौडेलं नागरिकता विधेयक प्रमाणीकरण यायानाः संवैधानिक प्रावधानया गलत व्याख्या याःगु धासें मुद्दा तःगु खः ।

वरिष्ठ अधिवक्तापिं बालकृष्ण नेउपाने व डा. सुरेन्द्र भण्डारीं विधेयक प्रमाणीकरण यायेगु झ्वलय् राष्ट्रपति पौडेलं संवैधानिक प्रावधान थः यत्थे छ्यःगु धासें प्रमाणीकरण याःगु कानुन तत्कालया नितिं छ्यलेगु पनेत माग याःगु दु ।

वंगु बुधवाः नागरिकता विधेयक प्रमाणीकरण यायेगु झ्वलय् राष्ट्रपति पौडेलं संविधानया धारा ६१ या उपधारा २, ३ व ४ अले धारा ६६ कथं विधेयक प्रमाणीकरण याःगु धासें शीतल निवासं विज्ञप्ति पिकाःगु खः । विज्ञप्ति कथं उगु कानुनी प्रावधानया लिसे ‘सर्वोच्च अदालतं प्रतिपादित सिद्धान्त समेत बमोजिम’ प्रमाणीकरण जूगु खः धकाः च्वयातःगु दु ।

रिट निवेदनय् धयातःगु दु, ‘च्वय् न्ह्यथनागु संवैधानिक प्रावधान छ्यलाः गुगुं नं विधेयक प्रमाणीकरण यायेफइ मखु । राष्ट्रपतिजुं उगु धारा छ्यलाः विधेयक प्रमाणीकरण याःगु ज्या आधारहीन व अवैधानिक जू ।’

उकथं हे प्रमाणीकरण मजूगु व प्रतिनिधिसभाया कार्यकाल क्वचाये धुंकूगु अवस्थाय् प्रमाणीकरणया निंतिं पेश जूगु विधेयक स्वतः निष्क्रिय जुइगु धासें रिट निवेदनय् संवैधानिक रुपय् निष्क्रिय जूगु विधेयकयात मन्त्रिपरिषदं मान्यता बीगु व प्रमाणीकरणया निंतिं पेश याये मजिउगु दाबी नं यानातःगु दु ।
मन्त्रिपरिषदं निर्णय यानाः विधेयक प्रमाणीकरणया नितिं राष्ट्रपतिया थाय् छ्वयेगु संवैधानिक प्रावधान मदु धासें मन्त्रिपरिषदं संसदया क्षेत्राधिकारय् दुहां वनाः संवैधानिक व्यवस्थाय् प्रहार याःगु दाबी यानातःगु दु ।

राष्ट्रपतिं छक्वः याःगु निर्णययात मेम्ह वइम्ह राष्ट्रपतिं हिले मफइगु धासें रिट निवेदनय् मन्त्रिपरिषदं विधेयक प्रमाणीकरणया नितिं राष्ट्रपति कार्यालययात च्वःगु पौ, उकिया आधारय् विधेयक प्रमाणीकरण यायेगु राष्ट्रपतिया निर्णय बदर यायेत माग यानातःगु दु ।

एमालेपाखें नं विरोध
प्रमुख प्रतिपक्ष दल नेकपा एमालें नागरिकता विधेयक प्रमाणीकरणपाखें संविधानया उल्लंघन व संसदया अपमान जूगु निष्कर्ष पिकाःगु दु । म्हिगः च्वंगु एमाले सचिवालयया बैठकं मन्त्रिपरिषदया सिफारिसय् राष्ट्रपतिं नागरिकता विधेयक प्रमाणीकरण यायेगु संविधान, कानुन व संसदीय मान्यता अःखः जूगु खँ धाःगु दु । तत्कालीन राष्ट्रपतिं संवैधानिक ईया दुने प्रमाणीकरण मयायेधुंकाः नागरिकता विधेयक निष्कृय जुइधुंकूगु धासें एमालें न्हूगु संसद वयेधुंकूगु अवस्थाय् थुकथं विधेयक प्रमाणीकरण यायेगु संसदया अपमान जूगु खँ धाःगु दु ।