ने. सं. ११४४ कौलाथ्व एकादशी - चालं

कविताया लाय्कूपाखें बहुभाषी कविता गोष्ठी

येँ(नेपालभाषा टाइम्स)- कविताया लाय्कू संस्थापाखें सम्पदा विषयक बहुभाषिक कविता गोष्ठी यात । गोष्ठीइ नेपालभाषा लिसें खस नेपाली, तामाङ, मैथिली, थारु, गुरुङ, मगः, उराँव, लिम्बु व थकाली भासं कविता वाचन जूगु खः ।

ज्याझ्वः येँ महानगरपालिकाया उपमेयर सुनिता डंगोलं त्वाः देवाय् मत च्याकाः उलेज्या यानादीगु खः । ज्याझ्वलय् न्ववासें वय्कलं येँया थीथी थासय् दयेकातःगु परम्परागत दबू धयागु साहित्यकार, कलाकार उत्पादन याइगु थाय् नं खः, उकिं थुकियात पुनर्जीवित यायेगु लागिं महानगरपालिकां ‘रिभाइभ दबू’ धकाः अभियान न्ह्याकागु व थुगु कविता पाठया ज्याझ्वः नं वहे अभियानया छगू अंगया रुपय् सञ्चालन यानागु खः धयादिल ।

ज्याझ्वः येँ मनपा १२ वडास्थित तीन देवल (पचली भैरवया लिउने) लागाया दबुलिइ जूगु खः । येँ मनपाया ग्वाहालि व नेपालमण्डल लिट्रेचर कल्चर ट्रष्टया सहकार्यय् कविताया लाय्कूपाखें उगु गोष्ठी याःगु खः ।

नेवाः न्ह्यलुवा मल्ल के. सुन्दरं वि.सं. २०२२ सालय् नेवाःतय्सं याःगु साहित्यिक आन्दोलन थीथी दबुलिइ हे सम्पन्न जूगु व उकिं यक्वं साहित्यकारत जन्मे याःगु खँ कनादिल । भाषा आयोगया दुजः सुरेश किरणं मातृभाषां कविता पाठ यायेबलय् उकी मेमेगु तत्वया कमी जूसां विशुद्ध कविताया सवाः वइगु जूगुलिं कवितय्सं थःथःगु मांभासं कविता च्वयेगु व ब्वनेगु ज्या न्ह्याकादीत इनाप यानादिल ।

ज्याझ्वलय् विशिष्ट पाहांपिं बूढानिलकण्ठ नगरपालिकाया उपमेयर अनिता लामा, नेपालभाषा एकेडेमिया सदस्य सचिव डा. पुष्पराज राजकर्णिकार, उषा शेरचन, धिरेन्द्र प्रेमर्षि, लक्ष्मी माली लिसें स्नेह साय्मि, अभय श्रेष्ठ, स्वप्निल स्मृति, रमि प्रिया, भूमिका थारु, छम गुरुङ, मन्दिरा श्रेष्ठ, मंजु श्रेष्ठ सिंह, मिलला शर्मा राजोपाध्याय, रश्मि नापित, चन्द्रबहादुर लामा, बसन्त नकःमि, हिरामती राना मगर, ईश्वर थोकर, कुमारी शरण उराँव, सीता तुम्खेवा, विनिता वज्राचार्यपिंसं कविता पाठ यानादीगु खः ।

कविताया लाय्कूया छ्यांज्ये रजनीमिलाया सभापतित्वय् जूगु उगु ज्याझ्वलय् लाय्कूया नायः डा. ज्योतिप्रभा तुलाधरं पोर्तुगलं छ्वयादीगु भिंतुना सन्देश ब्वनाः न्यंकादीगु खः ।