शैक्षिक सुधारया माग यासें विद्यार्थी संगठन आन्दोलनय्

येँ – थीथी च्यागू विद्यार्थी संगठनं शैक्षिक सुधारया माग यासें आन्दोलनय् कुहां वःगु दु । चिचिधंगु च्यागू विद्यार्थी संगठनं शैक्षिक सुधारया माग यासें आन्दोलनया घोषणा याःगु खः ।थन छगू पत्रकार सम्मेलनय् यासें इमिसं आन्दोलनया घोषणा याःगु खः । आन्दोलनया घोषणा याःपिं अनेरास्ववियु (क्रान्तिकारी), अनेरास्ववियु (पाँचौं), नयाँ शक्ति विद्यार्थी युनियन, राष्ट्रिय जनता पार्टी विद्यार्थी युनियन, समाजवादी विद्यार्थी फोरम लगायतया विद्यार्थी संगठन खः ।

इमिसं गुक्वःगु शिक्षा ऐन खारेज जुइमाःगु, शिक्षा क्षेत्रय् खने दयाच्वंगु विकृति अन्त्य जुइमाःगु, शिक्षा मन्त्रालयं गठन याःगु शुल्क अनुगमन समितिइ विद्यार्थी संगठनया प्रतिनिधियात दुथ्याकेमाःगु, चिकित्साशास्त्र सम्बन्धी छानविन आयोगया प्रतिवेदन कार्यान्वयन यायेमाःगु लगायत थीथी माग तयाः आन्दोलनय् कुहां वःगु खः ।

आन्दोलनरत विद्यार्थीतय्सं प्रधानमन्त्रीयात थःपिनिगु माग बारे ज्ञापन पौ लःल्हायेगु निसें कयाः शैक्षिक हडतालतकया आन्दोलना ज्याझ्वः घोषणा याःगु दु ।अथे हे गौतम बुद्ध भारतय् जन्म जूगु धकाः आखः ब्वंका वयाच्वंगु व भारतीय राष्ट्रिय गान हायेकीगु व स्यनीगु स्कुल बन्द यायेमाःगु, निजी कलेज व विद्यालयया वृद्धि जूगु शुल्क खारेज यायेमाःगु, शिक्षाय् लगानी याइपिं दलीय नेतायात कयाः छानविन यायेमाःगु, पाठ्यसफूलिइ कया वयाच्वंगु कमिसन खारेज यायेमाःगु लगायतया माग विद्यार्थीतय्सं याःगु दु ।

विद्यार्थी संगठनं घोषणा याःगु आन्दोलनया ज्याझ्वःकथं असार १६ गते तक प्रचारप्रसार, असार १७ गते शैक्षिक विकृति विरुद्ध बहस ज्याझ्वः, असार १८ गते देय्न्यंकं मिखाय् हाकुगु कापतं चिनाः सिट्ठी जुलुस पिकायेगु व असार १९ गते मशाल जुलुस पिकयाः प्रदर्शन यायेगु ज्याझ्वः सार्वजनिक याःगु दु ।