क्यानडाय् न्हूगु अध्यागमन नीति नेपाली विद्यार्थीतय्त गज्याःगु लिच्वः लाइ
क्यानडां वइगु निदँ तक थःगु देशय् अध्ययनया निंतिं वइपिं विद्यार्थीतय् ल्याः म्हो याइगु जुइवं थुकिया लिच्वः नेपालं क्यानडाय् ब्वं वनेत्यंपिं नेपाःमितय्त लाइगु खनेदुगु दु ।
आवास व स्वास्थ्य सुविधाय् समस्या वःगु धासें क्यानडां अध्ययनया निंतिं वइपिंत बीगु स्वीकृति ३५ प्रतिशत म्हो यायेगु खँ धाःगु खः ।
क्यानडाया अध्यागमन मन्त्री मार्क मिलरं थुगुसी स्नातक ब्वनेत वइपिं विदेशी विद्यार्थीत मध्य् २ लाख ६० हजारम्हेसित जक थःगु देशय् दुकायेगु खँ धाःगु दु । थुकिया प्रत्यक्ष लिच्वः नेपाःया विद्यार्थीतय्त नं लाइगु खँ शिक्षा मन्त्रालयया प्रवक्ता शिवकुमार सापकोटां धाःगु दु । थौंकन्हय् नेपालं क्यानडाय् ब्वनेत वनीपिनि ल्याः अप्वया च्वंगु इलय् क्यानडापाखें अनुमति कायेत थाकुइफुगु खँ धाःगु दु । थगुने जक नेपालं २१ हजारं मल्याक नेपाःमित क्यानडाय् अध्ययनया निंतिं वंगु खः ।
थुगुसी नं वंगु साउन निसें पुस मसान्त तक खुलाया दुने १२०४९ म्हेसिनं क्यानडाय् ब्वंवनेत अनुमति काःगु दु । थ्व ल्याः अस्ट्रेलियाय् वनीपिनि स्वयां अप्वःगु खँ अध्यागमन विभागया अधिकारीतय्सं धाःगु दु ।
सन् २०२२ य् क्यानडाय् अध्ययनया निंतिं जक च्यागू लाख विदेश विद्यार्थीत वःगु खः । छगू दशक न्ह्यः तक थ्व ल्याः धयागु मुक्कं २ लाख १४ हजार जक जुयाच्वंगु खः । थौंकन्हय् क्यानडाया थीथी प्रान्तय् च्वनाच्वंपिं विदेशी विद्यार्थीतय् चापयात ध्यानय् तयाः फुक्क प्रान्तय् निश्चित ल्याखय् विद्यार्थी थ्यनीगु कथं क्यानडा सरकारं नीति हयेत्यंगु दु । थुकिया निंतिं प्रान्तं हे थःपिनि क्षेत्रय् दुगु विश्वविद्यालययात विदेशी विद्यार्थी भर्नाया निंतिं कोटो तोके यानाबी । क्यानडां आः स्नातक व अन्डरग्राजुएट विद्यार्थीतय् ल्याः जक कटौती यायेत्यंगु खः । नेपाःया शैक्षिक परामर्शदातातय् कथं स्नातकोत्तर ब्वं वनेगु खःसा क्यानडाया न्हूगु नीतिं छुं लिच्वः लाकी मखु । अथेहे अध्ययन अनुमति नवीकरण याइपिं विद्यार्थीतय्त नं न्हूगु नीतिं लिच्वः मलाकीगु खँ धाःगु दु ।
न्हूगु नीति जूगु मू मू हिउपाः
क्यानडा सरकारं विदेशी विद्यार्थीतय् निंतिं हिउपाः हःगु नीति कथं वइगु सेप्टेम्बर तक स्नातक ब्वनाच्वंपिं विद्यार्थीतय् निंतिं वर्क पर्मित अर्थात श्रम स्वीकृति मबीगु जूगु दु । न्हापा थज्याःगु स्वीकृति सार्वजनिक निजी साझेदारीया ल्याखं बीगु याना वयाच्वंगु खः । अध्यागमन मन्त्रीं थ्व नीति छुं निश्चित देय्या निंतिं लागू जूगु मखसे फुक्क देय्या निंतिं लागू जुइ धाःगु दु ।
छुं कलेजतय्सं यक्व शुल्क कयाः यक्व ल्याखय् विदेशी विद्यार्थीतय्त भर्ना याःगु दु, तर विद्यार्थीतय् निंतिं आवश्यक ग्वाहालि मबिउगु खँ अनया हे मन्त्रीतय्सं धयाच्वंगु दु । शिक्षाया गुणस्तर कायम यानातयेगु निंतिं न्हूगु नीति हयेमाःगु खँ क्यानडां धाःगु दु ।
क्यानडाय् आवास समस्यायात कयाः सम्बोधन यायेमाःगु दबाब तच्वयाच्वंगु इलय् प्रधानमन्त्री जस्टिन टु«डोया सरकारं थ्व न्हूगु नीति घोषणा याःगु खः । वंगु निदँया दुने क्यानडाय् क्वथाया बाहा २२ प्रतिशत तक थहां वंगु खः । स्थानीयतय्सं आप्रवासीतय् ल्याः अप्वःगुलिं थथे जूगु खँ धया वयाच्वंगु दु ।
क्यानडाय् जनसंख्या वृद्धिदर उच्च दु । छुं न्हि न्ह्यः जक थनया जनसंख्या प्यंगू करोड थ्यंगु दु । ज्याथजिथि उमेरयापिं मनूतय् ल्याः अप्वया वःगुलिं ज्यामित आवश्यक जूगु कारणं नं क्यानडां न्हापा आप्रावसन नीति छ्वासुकूगु खः ।
नेपाःमि विद्यार्थीतय्त ग ज्याःगु लिच्वः लाइ ?
क्यानडाया न्हूगु नीतिं अन वनेगु योजना दयेकाच्वंपिं नेपाली विद्यार्थीतय्त नं लिच्वः लाइगु खँ शैक्षिक परामर्शदातातय्सं धाःगु दु । शैक्षिक परामर्शदातातय् संस्था ईक्यानया अध्यक्ष शेषराज भट्टराईया कथं नेपालं क्यानडा वनीपिं विद्यार्थीत अप्वः धयाथें स्नातक ब्वनेगु निंतिं वनी । आः क्यानडां स्नातक ब्वनीपिं विद्यार्थीतय्त वइगु सेप्टेम्बर
तक पीजीडब्ल्यूपी (श्रम स्वीकृति) मबिइगु जूगुलिं अन वनीपिं म्हो जुइगु खँ भाजु भट्टाराईं कनादीगु दु ।
न्हूगु नीति व अन खनेदयाच्वंगु आवास व रोजगारीया समस्याया कारणं क्यानडा वनेत यक्व खँय् बिचाः यायेमाःगु अवस्था वःगु दु । ‘अन वनेवं ज्या दइ धयागु अवस्था आः मंत’ भट्टराईं धाःगु दु । सन् २०२३ य् क्यानडा वंपिं विद्यार्थीत अन ब्वनेगु नापं ज्या नं दइगु जूगुलिं हे अप्वः वंगु खः ।
क्यानडा छाय् प्रमुख गन्तव्य जूवन ?
शिक्षा मन्त्रालयया कथं लिपांगु इलय् क्यानडा नेपाली विद्यार्थीतय् निंतिं प्रमुख शैक्षिक गन्तव्य जुयाच्वंगु दु । वंगु साउन निसें पुुस दुने जक १२०४९ म्हेसिनं क्यानडाय् ब्वं वनेगु निंतिं नो अब्जेक्सन लेटर काःगु दु । थ्व खुला दुने क्यानडा वनेत अनुमति काःपिं विद्यार्थीतय् ल्याः अस्ट्रेलिया व जापान वनीपिनि स्वयां अप्वः खः । वंगु आर्थिक दँय् २१ हजार स्वयां अप्वः नेपाली विद्यार्थीत क्यानडाय् वनेत मन्त्रालयपाखें अनुमति काःगु खः । थ्व ल्याः धयागु अस्ट्रेलिया धुंकाः दकलय् अप्वः खः । वंगु आर्थिक दँय् ३१ हजारं मल्याक विद्यार्थीत अस्ट्रेलिया वंगु खः । क्यानडा धुंकाः दकलय् अप्वः जापानय् अध्ययनया निंतिं वंगु खनेदुगु खः ।
थ्वयां न्ह्यः अर्थात आर्थिक दँ २०७८–७९ तक क्यानडा वनीपिं विद्यार्थीत अस्ट्रेलिया, जापान व अमेरिका वनीपिं स्वयां यक्व हे म्हो जक दुगु खः । उगु आर्थिक दँय् मुक्कं न्याद्वः म्हेसिनं जक क्यानडा वनेगु निंतिं अनुमति काःगु खः । कोभिड महामारी जुयाच्वंगु इलय् आर्थिक दँ २०७७–७८ य् मुक्कं २४७५ म्हेसिनं जक क्यानडाय् ब्वं वनेगु निंतिं अनुमति काःगु खः । मन्त्रालयया प्रवक्ता सापकोटाया कथं आः भिसा नीति सहज जूगुलिं नेपाली विद्यार्थीत क्यानडा वनाच्वंगु खः । वय्कलं धयादी, ‘विश्वविद्यालयं बीगु सुविधा व भिसा लगायतया अध्यागमनय् हःगु उदार नीति व अध्ययनया नापनापं रोजगारीया सम्भावना दुगुलिं यक्व मनूत क्यानडा वंगु खनेदु ।
ईक्यानया अध्यक्ष भट्टराईया कथं अस्ट्रेलियाय् आप्रवासी विद्यार्थीतय्त याःगु कडाइ व क्यानडाय् याउँक भिसा काये फइगु अवस्था वःगुलिं नं यक्व नेपाली विद्यार्थीत क्यानडापाखे आकर्षित जूगु खः । तर क्यानडा अस्ट्रेलिया थें विदेशी विद्यार्थीतय् निंतिं फुक्क कथं बांलाःगु मजूगु निगु व थन ज्या यानाः ब्वनेगु सुविधाया निंतिं सरकारं माःगु पूर्वाधारया व्यवस्था मयाःनिगु खँ नं वय्कलं धयादी ।
‘क्यानडाय् भिसा काये अःपु । खर्च धाःसा क्यानडा वनेत नं अस्ट्रेलिया वनेत नं उलि हे जुइ’ भट्टराई नं धयादी । वय्कःया कथं थौंकन्हय् क्यानडा वनेत नेपाली विद्यार्थीतय्सं २०–२५ लाख तका खर्च यानाच्वंगु दु ।
क्यानडाय् दुगु समस्या
क्यानडाय् ज्या मदयाः डिप्रेसनं वंम्ह धाःम्ह छम्ह नेपाःमि विद्यार्थीयात उद्धार यानाः स्वदेश लित छ्वयागु खँ गैरआवासी नेपाली संघ एनआरएनएया छम्ह प्रतिनिधिं कंगु दु । एनआरएनए एनसीसी क्यानडां न्हूपिं विद्यार्थीतय् निंतिं वंगु नोवेम्भरय् छगू वेबिनारया ग्वसाः ग्वयाः अन वने चाहे जूपिं नेपाली विद्यार्थीतय्सं फयेमालेफुगु चुनौतीयात कयाः सहलह याःगु खः ।
एनआएनए क्यानडाया फेसबुक पेजय् तयातःगु उगु भिडियोय् विजय अधिकारी नांया छम्ह पुलांम्ह विद्यार्थीं थःत क्यानडाय् क्वथा मालेत व ज्या मालेत समस्या जुयाच्वंगु खँ धाःगु खः । ‘कोभिड स्वयां न्ह्यः थन ज्या लुइकेत व क्वथा नं लुइकेफइगु अवस्था दुगु खः । तर आः अथे मखु । आः खराब मन्दी जुयाच्वंगु दु ।’ थः न्हापा वयाबलय् थन ज्या मालेत समस्या मजूगु व न्युनतम ज्याला स्वयां अप्वः तलब दइकथं ज्या लूगु खँ वं धाःगु खः ।
‘थौंकन्हय् थन वयेधुंकाः स्वला निसें खुला तक थःत सेटल यायेत थाकु’ वं वेबिनारय् धाःगु खः । थ्वहे दथुइ गुलिसिनं जागिर मिले यानाबी, च्वनेगु थाय् मालाबी धकाः ठगे यानाच्वंगु धासें एनआरएनएं सचेत नं याःगु दु ।
बिबिसीया ग्वाहालिं
LEAVE YOUR COMMENTS