ने. सं. ११४३ तछलाथ्व त्रयोदशी -

मनकामना देगलय् लुं सिइत १५ किलो लुँ

येँ – नांजाःगु मनकामना देगः पलिइ लुं सिइगु ज्या न्ह्याःगु दु । देगलय् लुं सिइगु निंतिं जक १५ किलो लुँ न्यानागु खँ देगः जिर्णोद्धार समितिं धाःगु दु । लुँ सिइगु निंतिं न्याःगु लुँया मू जक स्वंगू करोड ५७ लाख तका थ्यंवः ।

न्हापा हे छुं भचा जीर्ण खनेदयेधुंकूगु देगः वि.सं. २०७२ वैशाख १२ या तःभुखाचं यानाः थप स्यनेवं देगः ल्ह्वनेगु (जीर्णोद्धार) ज्या जूगु खः । पुलांगु हे शैली जीर्णाेद्धार जुयाच्वंगु देगःया पलिइ लीया पौ दयेकाः उकी लुं सिइगु ज्या याःगु खः ।

जिर्णोद्धार समितिया कजि नरेन्द्र बाबु श्रेष्ठया कथं नितँया पौ मध्ये च्वय्या पलिइ लुं सिइधुंकूगु दुसा क्वय्या पलिइ आः लुं सिइगु ज्या न्ह्याःगु दु ।’ वय्कलं निसः स्वसः दँ तक तुइकथं लुं सियागु दावी नं यानादीगु खः ।

तःभुखाय् ब्वःगु निला लिपा हे सुरु जूगु जीर्णोद्धारया ज्या आः ९० प्रतिशत सिधयेधुंकूगु खँ धाःगु दु । वइगु खुला दुने पूवंके ज्या सिधइगु खँ समितिं धाःगु दु । आः याकनं हे साइत स्वयाः देगःया गजू तयेगु खँ कजि श्रेष्ठं कनादीगु दु । मनकामना देगः जीर्णोद्धारया निंतिं १३ करोड दां खर्च जुइगु अनुमान यानातःगु दु । देगः दयेकेगु निंतिं भक्तजनपाखें जक हे च्यागू करोड दां मुंगु खँ धासें समितिं ध्यबाया कारणं ज्या दिकेमाःगु अवस्था मवःगु खँ धाःगु दु । देगः ल्ह्वनेगु निंतिं पुरातत्व विभागपाखें नं प्यंगू करोड दां वःगु खः ।