मेट्रोभेष्टया साधारणसभा ज्येष्ठ नागरिकयात सम्मान

येँ – अशक्त व्यक्तिपिंत माःगु कथं ग्वाहालि यानाः, बालदिवस लसताय् मस्तय्त ग्वाहालि यानाः, दँय्दसं हिदान व स्वास्थ्य शिविर यायेगु नापं थीथी सामाजिक ज्याय् च्यादँ न्ह्यवंनिसें न्ह्यचिलाच्वंगु येँया मेट्रोभेष्ट बचत तथा ऋण सहकारी संस्थाया गुक्वःगु साधारण सभा वंगु सनिवाः छगू ज्याझ्वःया दथुइ सम्पन्न जुल ।

संस्थाया अध्यक्ष राजु महर्जनं त्वाःदेवाय् मत च्याकाः उलेज्या यानादीगु उगु ज्याझ्वलय् कार्यकारी अधिकृत ओमकुमार प्रधानं संस्थाया प्रगति विवरण नापं भावी योजना बारे प्रतिवेदन, लेखा समितिया दुजः प्रशन्ना कोइरालां लेखा समितिया प्रतिवेदन व लेखापरीक्षक पन्नारत्न वज्राचार्यं लेखापरीक्षण विवरण न्ह्यब्वःगु खः । ज्याझ्वलय् अध्यक्ष महर्जनं संस्थाया ७० दँ पुले धुंकूपिं ज्येष्ठ नागरिक दुजःपिंत सम्मान पत्र नापं दोसल्ला न्ययेकाः सम्मान यानादीगु खः ।