देय् दबूया छेँ धस्वाइगु जुल
येँ (नेपालभाषा टाइम्स)÷नेवाःतय्गु राष्ट्रिय संगठन नेवाः देय् दबूया थःगु हे छेँ धस्वाइगु जूगु दु । थुकिया लागिं देय् दबुलिं जग्गा न्यायेगु ज्या क्वचायेकूगु दुसा आः कंस शुक्रवाः छगू ज्याझ्वःया दथुइ छेँया जग स्वनीगु जूगु दु ।
देय् दबुलिं थ्व जग्गा येँ मनपा १५ वडाय् लाःगु चःमति लागाय् न्याःगु खः । येँ मनपा अन्तर्गत लाःगु चःमति जग्गा एकीकरण आयोजनायाके थ्व जग्गा न्याना काःगु खः । जग्गाया क्षेत्रफल १२६ वर्ग मिटर (करिब ४ आना) दु । थुकिया मू १ करोड ७६ लाख ५४ हजार १०८ तका तूगु खः । जग्गा न्यायेत माःगु दां नेपाः दुने व पिने च्वंपिं भाषाह्यमि साहु लिसें थीथी नेवाःतय् व्यक्तितपाखें ग्वाहालि कथं मुंकूगु खः ।
महानगरपालिका लिसें चःमतिया स्थानीयवासीया समेत ग्वाहालिं थ्व जग्गा न्यायेफुगु खः । मनपां देय् दबूयात जग्गाया अस्थायी पूर्जा बीधुंकूगु दु । उकियात मालपोतय् वनाः पास यायेगु ज्या धाःसा छुं ई लिपा जक यायेगु खँ देय् दबूया नायः पवित्र वज्राचार्यं कनादिल ।
देय् दबूया थ्व छेँ दनेगु लागिं नं येँ मनपां हे आर्थिक ग्वाहालि यायेत्यंगु खँ सीदुगु दु । न्हापांगु दँया लागिं आःया बजेटय् १ करोड दां फ्यायेधुंकूगु दु । पूवंक छेँ दनेगु लागिं थ्यंमथ्यं ३ करोड ५० लाख तका खर्च जुइगु प्रारम्भिक अनुमान जूगु दु । थ्वहे बजेटय् ध्यबा छुटे याकेगु लागिं येँ मनपाया उपमेयर सुुनिता डंगोलं विशेष पहल यानादीगु खः ।
देय् दबूया नायः वज्राचार्यं कनादी कथं थ्व छेँ निदँया दुने दने सिधयेकेगु ताः तयातःगु दु । कंस शुक्रवाः सुथय् ७ बजेनिसें पुजा यानाः जग स्वनेगु ज्याझ्वः दयेकातःगु दु । जग्गा चःमतिइ लाःसां स्वयम्भू भगवान पाउं वनस्थली वनेबलय् लँय् वइगु अजिमा हलं बाया वनेबलय् याकनं थ्यं । जग स्वने ज्याझ्वलय् ब्वति कायेत नं नायः वज्राचार्यं सकसितं इनाप यानादीगु दु ।
LEAVE YOUR COMMENTS